لاہور : امیر جماعت اسلامی سینیٹر سراج الحق نے کہا ہے کہ مقبوضہ کشمیر میں بھارتی فوج کے مظالم بڑھتے جارہے ہیں لیکن دنیا بھر کے انسانی حقوق کے ادارے سوائے مذمتوں سے آگے نہیں بڑھ سکے۔
ان خیالات کا اظہار انہوں نے جماعت اسلامی کے مرکز منصورہ لاہور میں میڈیا سے گفتگو کرتے ہوئے کیا، انہوں نے کہا کہ کشمیر کے مسئلہ پر دنیا بے حس اور حکمران بےبس ہوچکے ہیں۔
وزیر اعظم کی تقریرکو10دن گزر گئے اب تک دنیا ٹس سے مس نہ ہوئی،64دن سے کشمیر میں زندگی مفلوج ،80لاکھ افراد محصور ہیں، مقبوضہ کشمیر میں دوائیں ختم،لوگ بیماریوں، بھوک سےمررہےہیں۔
سینیٹر سراج الحق نے مزید کہا کہ دنیا بھر کےانسانی حقوق کے ادارے مذمتوں سے آگے نہیں بڑھ سکے، جب تک ہمارے حکمران خود کوئی عملی قدم نہیں اٹھاتے، دنیا ایسے ہی خاموشی نہیں توڑے گی۔
سراج الحق نے کہا کہ حکومت اپنی ناکامی اور نااہلی سے عوام کی توجہ ہٹانے کیلئے نان ایشوز کو ایشو بنارہی ہے، ضرورت تھی کہ حکومت عوام کی پریشانیوں کا حل نکالتی، حکمران عوام کو ریلیف دینے کی بجائے مزید تکلیف دے رہے ہیں۔
