لاہور : امیر جماعت اسلامی سراج الحق نے کہا کہ ہے ملک میں ایمرجنسی یا مارشل لاء کا نفاذ مسائل کا حل نہیں اس سے بحران مزید بڑھے گا۔
ان خیالات کا اظہار انہوں نے لاہور میں میڈیا کے نمائندوں سے گفتگو کرتے ہوئے کیا، انہوں نے کہا کہ جتنی ضرورت ڈائیلاگ کی آج ہے پہلے کبھی نہ تھی۔
ایک سوال کے جواب میں انہوں نے کہا کہ ملک میں ایمرجنسی یا مارشل لاء کا نفاذ مسائل کا حل نہیں اس سے بحران مزید بڑھے گا، عوام کو فیصلے کا اختیار دیا جائے۔
انہوں نے کہا کہ اسلام آباد سازشوں کا گھڑ بن گیا ہے، لڑائی نہ روکی گئی تو یہ گلی کوچوں تک پھیل جائے گی، سیاسی جماعتیں بلوغت کا مظاہرہ کریں۔
سراج الحق نے کہا کہ تمام صورت حال کے براہ راست متاثرین ملک بھر کے کروڑوں غریب عوام ہیں،پی ڈی ایم اس وقت حکومت میں ہے، جلسوں کی بجائے نظام ٹھیک کرنے پر توجہ دے۔
واضح رہے کہ وزیراعظم شہباز شریف کی زیر صدارت کابینہ کے اجلاس میں ملک میں ایمرجنسی کے نفاذ کی تجویز پیش کی گئی تھی، اجلاس میں اسمبلیوں کی مدت میں توسیع کی تجویز کا بھی جائزہ لیا گیا۔
دوسری جانب تحریک انصاف کے وکیل شعیب شاہین نے اپنے بیان میں کہا کہ پی ڈی ایم جماعتیں الیکشن کا التواء چاہتی ہیں، پی ڈی ایم کی حکومت ملک میں ایمرجنسی لگانے کے بہانے ڈھونڈ رہی ہے یہ امن وامان کی صورتحال کے بہانے بنا کر الیکشن سے فرار چاہتے ہیں۔
