اسلام آباد : امیر جماعت اسلامی سراج الحق نے کہا ہے کہ کشمیر پاکستان کی شہ رگ ہے جسے بھارت کے چنگل سے آزاد کرا کے پاکستان کو مکمل دیکھنا چاہتے ہیں.
وہ آب پارہ چوک پر یوم یکجہتی کشمیر کی مناسبت سے منعقد کیے گئے جلسے سے خطاب کر رہے تھے، سراج الحق کا کہنا تھا کہ پاکستان کی شہ رگ دشمن کے قبضے میں ہے جسے دشمن کی چنگل سے آزاد کرانا اولین ترجیح ہے.
امیر جماعت اسلامی نے کہا کہ کشمیری خود کو پاکستانی کہتے ہیں اور کشمیر کو پاکستان کا حصہ مانتے ہیں لیکن بھارت نے کشمیر پر ناجائز قبضہ کر رکھا ہے جس کے خلاف غیور کشمیری تحریک آزادی چلا رہے ہیں.
سراج الحق نے کہا کہ کشمیریوں کے حق خود ارادیت کے لیے ایک ایک پاکستانی اپنے کشمیری بھائی کے شانہ بشانہ کھڑا ہے اور تمام تر اخلاقی سپورٹ کرنے کو تیار ہے کیوں کہ کشمیریوں سے رشتہ کلمے کی بنیاد پر ہے.
انہوں نے مزید کہا کہ 70سال سے نہتے کشمیری 8 لاکھ بھارتی فوج سے نبرد آزما ہیں اور آج بھی کشمیری شہداء خود کو پاکستانی پرچم میں لپیٹ کر دفن کرنے کی وصیت کرتے ہیں.
اسی سے متعلق : آج یوم یکجہتیِ کشمیرملی جوش وجذبے سے منایا جارہا ہے
امیر جماعت اسلامی نے کہا کہ ہمیں سوچنا ہوگا کہ کشمیر کی آزادی کے لیے ہم نے کیا کیا ہے ؟ بھارت سے بہنے والے دریاؤں میں کشمیریوں کا خون شامل ہوتا ہے.
انہوں نے تحریک آزادی کشمیر کے نوجوان رہنما برہان وانی شہید کو خراج تحسین پیش کرتے ہوئے کہا کہ وانی پاکستانی قوم کا ہیرو ہے جس کی جرات و بہادری پر پوری قوم سلام پیش کرتی ہے.
