افغانستان کے وزیرداخلہ سراج الدین حقانی نے طالبان حکومت سے اختلاف پر استعفا دے دیا۔
افغان میڈیا رپورٹ کے مطابق سراج الدین حقانی نے افغان طالبان کے سربراہ ہیبت اللہ اخوندزادہ کو استعفیٰ بھجوادیا جو انہوں نے منظور کر لیا۔
افغان میڈیا رپورٹ میں کہا گیا ہے کہ طالبان قیادت کے اندرونی اختلافات استعفے کی وجہ بتائی جارہی ہے اور سراج الدین حقانی کی وزارت کی ذمہ داریوں سے طویل غیر حاضری بھی استعفے کی وجہ ہے۔
میڈیا رپورٹ کے مطابق حقانی نیٹ ورک خواتین کو اعلیٰ تعلیمی حق دینے کا حامی تھا، جس کی وجہ سے طالبان قیادت سے اختلافات پیدا ہوئے۔
افغان انٹرنیشنل کی رپورٹ میں کہا گیا ہے کہ سراج الدین حقانی کے مستعفی ہونے سے متعلق طالبان حکومت کا کوئی بیان نہیں آیا اس کے علاوہ افغان طالبان کی جانب سے سراج الدین حقانی کے مستعفی ہونے کی تصدیق یا تردید نہیں ہوسکی ہے۔
سراج الدین حقانی دو ماہ بعد گزشتہ روز ہی خوست میں منظر عام پر آئے تھے۔ وہ قندھار میں ہونے والے کابینہ کے اجلاس میں بھی شریک نہیں ہوئے تھے۔
