امیر جماعت اسلامی پاکستان سراج الحق کا کہنا ہے کہ پاکستان حقیقی طور پر دیوالیہ ہونے کی آخری سرحد پر کھڑا ہے۔
لوئر دیرکے علاقے تیمر گراہ میں میڈیا سے گفتگو میں سراج الحق نے کہا کہ مرکزی اور صوبائی حکومتوں کے پاس سرکاری ملازمین کے تنخواہوں کے پیسے نہیں، ناکام پالیسی کی وجہ سے سبز پاسپورٹ کمزور ترین پاسپورٹ بن چکا ہے۔
سراج الحق نے عام انتخابات سے قبل انتخابی اصلاحات کو لازمی قرار دے دیا۔ انہوں نے کہا: ’انتخاب سے پہلے اصلاحات لازمی ہے۔ اصلاحات کے بغیر انتخابات کا کوئی فائدہ نہیں۔‘
یہ بھی پڑھیں: قوم ووٹ کے ذریعے کرپٹ افراد اور جماعتوں کا احتساب کرے، سراج الحق
گزشتہ روز سراج الحق نے اپنے ایک بیان میں کہا تھا کہ پی ڈی ایم، پی پی اور پی ٹی آئی کے طرزِ حکمرانی نے ملک کو مفلوج کر دیا، حکمرانوں کی خواہش ہے اسٹیبلشمنٹ، عدلیہ اور الیکشن کمیشن ان کی تابعداری کریں۔
ان کا کہنا تھا: ’جماعت اسلامی اداروں کو نیوٹرل دیکھنا چاہتی ہے۔ حکمرانوں کی سیاست ذاتی مفادات کے گرد گھومتی ہے۔ ملک کو بیرونی این جی اوز کا اصطبل بنانے والوں سے بہتری کی توقع نہیں۔ حکمران جان لیں ملک بیرونی قرضوں اور بھیک پر نہیں چلتے۔‘