لاہور: امیر جماعت اسلامی پاکستان سراج الحق نے کہا ہے کہ عوامی حقوق کے لیے جماعت اسلامی کی جدوجہد جاری رہے گی، ہم جاننا چاہتے ہیں کہ ہم پر خود کش حملے میں کون ملوث ہے۔
تفصیلات کے مطابق امیر جماعت اسلامی سراج الحق نے منصورہ دفتر کا دورہ کیا، اس موقع پر گفتگو کرتے ہوئے انھوں نے کہا کہ اللہ تعالی کے کرم اور عوام کی دعاؤں سے حملے میں کوئی بڑا نقصان نہیں ہوا لیکن ہم جاننا چاہتے ہیں کہ خود کش حملے میں کون ملوث ہے۔
سراج الحق نے کہا جماعت اسلامی بغیر کسی خوف کے عوام کے حقوق کی جدوجہد جاری رکھے گی، عوام کے تعاون کے بغیر امن قائم نہیں ہو سکتا، حکومت بلوچستان میں امن و استحکام کے لیے مشاورت کا آغاز کرے۔
امیر جماعت اسلامی نے کہا ’’ملک کو مزید عدم استحکام سے بچانے کے لیے مذاکرات کا آغاز کرنا ہوگا، ہم اب بھی سمجھتے ہیں کہ مذاکرات ہی بہتری کا راستہ ہیں۔‘‘
سراج الحق نے مزید کہا ’’عوام کو فیصلے کا اختیار دیا جائے، بہتر ہوگا کہ سیاسی جماعتیں اگست میں شفاف انتخابات کے لیے اتفاق رائے پیدا کر لیں۔‘‘
