کراچی: شہر قائد کے مختلف علاقوں میں تاحال دھرنے جاری ہیں، جس سے شہریوں کو آمدورفت میں مشکلات کا سامنا ہے، تاہم کئی مقامات پر پولیس نے دھرنے ختم کرا دیے ہیں۔
عباس ٹاؤن میں پولیس نے دھرنا ختم کرا دیا ہے، سرجانی کے ڈی اے فلیٹس پر بھی احتجاجی دھرنا ختم ہو گیا ہے، ٹریفک پولیس کے مطابق فائیو اسٹار چورنگی، گلستان جوہر میں دھرنا ختم کرا دیا گیا ہے۔
نواب صدیق علی خان روڈ چورنگی ناظم آباد نمبر 1 اور 2 کو کھول دیا گیا ہے، شاہراہ پاکستان مین عائشہ منزل چورنگی کو ٹریفک کے لیے کھول دیا گیا، انچولی شاہراہ پاکستان، سہراب گوٹھ کو بھی ٹریفک کے لیے کھول دیا گیا ہے۔
دوسری طرف ایم اے جناح روڈ نمائش چورنگی پر مرکزی دھرنا جاری ہے، جہاں پولیس کی بھاری نفری تعینات ہے، ٹریفک پولیس کے مطابق نمائش چورنگی بند ہونے پر متبادل راستے سے ٹریفک گزارا جا رہا ہے، گرو مندر سے سولجر بازار، گارڈن جانے والے راستوں کو استعمال کیا جائے، کوریڈور 3 سے گرومندر اور لسبیلہ جانے والا روڈ کھلا ہوا ہے، یونیورسٹی روڈ، سفاری پارک کے قریب دھرنا دوبارہ شروع ہو گیا ہے۔
ویڈیو رپورٹ: دھرنوں کے خلاف کراچی پولیس نے کارروائی شروع کر دی، عباس ٹاؤن میں زبردست شیلنگ
کراچی کے دیگر علاقوں کامران چورنگی، جوہر موڑ، یونیورسٹی روڈ، اور شمس الدین عظیمی روڈ پر دھرنا جاری ہے، دھرنوں کے اطراف سڑکیں بدستور بند ہیں، ٹریفک پولیس کے مطابق دھرنوں کے کئی مقامات پر سڑکوں کے ایک ٹریک پر ٹریفک چل رہا ہے، اور ٹریفک کو متبادل راستوں پر گزارا جا رہا ہے۔
کئی مقامات پر سڑکوں اور متبادل راستوں پر ٹریفک کا رش ہے، ٹریفک پولیس کا کہنا تھا کہ مسافر حضرات سے گزارش ہے کہ تحمل کا مظاہرہ کریں، اور احتجاجی مظاہروں کے علاقوں میں جانے سے گریز کریں۔
ٹریفک پولیس نے ہدایت کی ہے کہ زحمت اور پریشانی سے بچنے کے لیے متبادل راستوں کا انتخاب کریں، اور رہنمائی کے لیے ٹریفک ہیلپ لائن 1915 پر رابطہ کریں۔
واضح رہے کہ 2 دن وقفے کے بعد کوہاٹ میں آج کرم مسئلے پر دوبارہ گرینڈ جرگہ شروع ہو گیا ہے، جرگے میں اسلحہ اکٹھا کرنے، بنکرز مسمار کرنے، اور راستے کھولنے پر بات ہوگی، ذرائع کا کہنا ہے کہ 6 قبائل کے عمائدین ایپکس کمیٹی فیصلے کے مطابق معاہدے پر دستخط کے لیے آمادہ ہیں، جب کہ طوری قبیلے کے عمائدین پہلے راستے کھولنے کی بات کر رہے ہیں۔ شرکا مطالبہ کر رہے ہیں کہ بگن بازار میں 6 قبائل کا دھرنا گزشتہ 5 روز سے جاری ہے، راستے کھول کر اشیائے خورد و نوش کی قلت کو دور کیا جائے۔
