بھارتی جارحیت کے جواب میں پاکستان کے آپریشن بنیان مرصوص کے پیش نظر بالی وڈ کے معروف اداکار عامر خان کی فلم ’ستارے زمین پر‘ کی ریلیز ملتوی کر دی گئی۔
انڈین میڈیا کی رپورٹس کے مطابق ’ستارے زمین پر‘ کی ریلیز ملتوی کرنے کا باضابطہ اعلان ’عامر خان پروڈکشن‘ کی جانب سے انسٹاگرام پوسٹ کے ذریعے کیا گیا۔
فلم کو 20 جون 2025 کو سینما گھروں میں نمائش کیلیے پیش کیا جانا تھا جس کیلیے تیاریاں حتمی مراحل میں تھیں۔ ’ستارے زمین پر‘ کی نئی ریلیز ڈیٹ کا اعلان بعد میں کیا جائے گا۔
View this post on Instagram
ذرائع نے بتایا کہ ملکی سرحدوں پر جاری حالات اور ملک گیر الرٹ کے حوالے سے عامر خان پروڈکشن نے اپنی آنے والی فلم کو ملتوی کرنے کا فیصلہ کیا ہے۔
یاد رہے کہ یہ فلم اداکار کی 2022 کی فلم ’لال سنگھ چڈھا‘ کے بعد سلور اسکرین پر واپسی کی نشاندہی کرتی ہے جو فاریسٹ گمپ کا آفیشل ہندی ریمیک ہے۔
یہ فلم 2007 میں ریلیز ہونے والی فلم ’تارے زمین پر‘ کا سیکوئل ہے۔ اس فلم میں عامر خان کے ساتھ جنیلیا دیش مکھ بھی اہم کردار میں ہیں اور اس کی ہدایت کاری آر ایس پرسنا کر رہے ہیں جنہوں نے شوبھ منگل ساودھن کی ہدایت کاری کی تھی۔
