کراچی: پولیس نے سائٹ ایریا میں شادی کے موقع پر چلتی بس میں لڑکی کو گولی لگنے کا واقعہ مشکوک قرار دیا ہے۔
تفصیلات کے مطابق پولیس حکام کا کہنا ہے کہ کراچی کے علاقے سائٹ ایریا میں ایک شادی کی تقریب میں فائرنگ سے لڑکی کے جاں بحق ہونے کے واقعے میں مقتولہ کی شناخت 17 سالہ خدیجہ بی بی کے نام سے ہوئی ہے۔
لاش ضابطے کی کارروائی کے لیے عباسی شہید اسپتال منتقل کر دی گئی، ورثا کے بیان کے مطابق خدیجہ کو چلتی بس میں گولی لگی تھی۔ اسپتال رپورٹ کے مطابق خدیجہ کو سر پر لگنے والی گولی وجہ موت بنی۔
پولیس تاحال جائے وقوعہ کا تعین نہیں کر سکی ہے کہ لڑکی کو گولی کہاں لگی، جب کہ مقتولہ کے ورثا کی جانب سے متضاد بیانات دیے جا رہے ہیں، پولیس حکام نے کہا ہے کہ بظاہر ایسا لگتا ہے کہ ورثا حقائق کو چھپانے کی کوشش کر رہے ہیں۔
پولیس حراست میں ملزم کی موت کی تحقیقات میں ایس پی نیئر سے متعلق سنسنی خیز انکشاف
واضح رہے کہ اندھی گولیوں سے شہریوں کے جاں بحق اور زخمی ہونے کے واقعات میں ایک بار پھر بے حد اضافہ ہو گیا ہے، لانڈھی قذافی ٹاؤن میں ایک گھر کی چھت پر نامعلوم سمت سے گولی لگنےسے 6 سالہ بچہ ابوبکر زخمی ہو گیا ہے۔
ماڑی پور مچھر کالونی میں بھی نامعلوم سمت سے گولی لگنے سے کائنات نامی ایک خاتون زخمی ہو گئی ہے، عوامی کالونی میں اندھی گولی لگنے سے ایک خاتون زخمی، جب کہ تین ہٹی کے قریب اندھی گولی لگنے سے 11 سالہ لڑکا بشیر زخمی ہو گیا ہے۔
