کراچی: سندھ انسٹی ٹیوٹ آف یورولوجی اینڈ ٹرانسپلانٹ میںمنعقدہ چھٹی منیمل انویزو سرجری کانفرنس کا انعقاد کیا گیا، کانفرنس میں پاکستان میں روبوٹک سرجری سے متعلق آگاہی دی گئی۔
تقریب میں پاکستان اور بیرون ملک سے سے آئے ہوئے ماہرین سرجری نے ایس آئی یو ٹی میں منعقدہ چھٹی منیمل انویزو سرجری کانفرنس کی افتتاحی تقریب میں اپنے خیالات کا اظہار کرتے ہوئے امید ظاہر کی کہ ملک میں روبوٹک سرجری کے سینٹر زکی تعداد میں اضافہ ہو، جس کی وجہ سے یہ جدید طریقہ علاج عام آدمی کی دسترس میں آسکے۔یہ تین روزہ کانفرنس اور ورکشاپ 19 جنوری تک جاری رہے گی۔
اس موقع پر ڈاکٹر ادیب رضوی ڈائریکٹر ایس آئی یو ٹی نےتقریب سے خطاب کرتے ہوئے شرکاء کا خیر مقدم کیااور کہا کہ اس کانفرنس اورورکشاپ میں شریک ماہرین کی خدمات قابل قدر ہیں کیونکہ وہ اپنی مصروفیات سے وقت نکال کرعملی جراحی کی جدید سائنس روبوٹک سرجری کے بارے میں اپنے تجربات سے آگاہ کریں گے۔انہوں نے کہا کہ اس ورکشاپ میں شرکاء کے لئے روبوٹ کی مدد سے سرجری، لپروسکوپک سرجری، بین الاقوامی ماہرین کے لیکچرزاورپینل ڈسکشن کو شامل کیا گیا ہے۔
کانفرنس سے ممتازطبی ماہرین نے بھی خطاب کیا ۔انہوں نے ورکشاپ کی سرگرمیوں، جنرل سرجری ورکشاپ ، یورولوجی ورکشاپ ،گائناکالوجی ورکشاپ، لپروسکوپک اور روبوٹک سرجری اور ملک میں لپروسکوپک اور روبوٹک سرجری کے موضوعات پر روشنی ڈالی۔انہوں نے کہا کہ اگر ملک میں روبوٹک کے معیاری سینٹرکی تعداد میں اضافہ کیا جائے تو یہ روبوٹک کی مہنگی سرجری کی لاگت کو کم کرنے میں اہم کردار ادا کر سکتی ہے۔
انہوں نے کہا کہ یہ اپنی نوعیت کی پہلی ورکشاپ ہے جس میں تین اہم شعبہ جات جن میں جنرل سرجری، یورولوجی اور گائناکالوجی میں روبوٹک سرجری کی اہمیت اور افادیت پر روشنی ڈالی جائے گی۔ماہرین نے کہا کہ روبوٹک سرجری مریض کے لیے نہایت سود مند ثابت ہوتی ہے۔ شرکاء کو تمام آپریشن سول ہسپتال کراچی تھیٹر کمپلیکس سے براہ راست دکھائےگئے۔ 
آج کے ورکشاپ کے ماہرین میں پروفیسر محمدشمیم خان،پروفیسر امجد سراج میمن،پروفیسر الطاف ہاشمی، فوزیہ پروین، پروفیسرامجد پرویز چیمہ، پروفیسر ساجدہ قریشی اور پروفیسر اسد شہزاد شامل تھے۔
یاد رہے اس کانفرنس و ورکشاپ میں برطانیہ سےآنے والے ممتاز ماہرین میں لندن کے کنگز کالج اورگائزاینڈ سینٹ تھامس ہسپتال کے پروفیسر محمد شمیم خان، لندن کے گائز اینڈ سینٹ تھامس ہاسپیٹل اور مڈوے میری ٹائم ہسپتال کینٹ کے کنسلٹنٹ یوروجیکل سرجن پروفیسر متین شریف، رائل فری ہسپتال کے کنسلٹنٹ یوروجیکل سرجن اوراعزازی سینیئرلیکچرر ڈاکٹر فیض ممتاز، گائز اینڈ سینٹ تھامس ہسپتال اور برج اینڈ پرنسزگریس ہسپتال لندن کی کنسلٹنٹ گائناکالوجسٹ محترمہ کنکی پتی شانتی راجو ، پول این ایچ ایس فاؤنڈیشن ٹرسٹ اور چمپالی ماد فائونڈیشن لسبن کےکنسلٹنٹ سرجن پروفیسر امجد پرویز شرکت کر رہے ہیں۔
