کراچی: شہر قائد میں واقع سندھ انسٹی ٹیوٹ آف یورولوجی اینڈ ٹرانسپلانٹ (ایس آئی یو ٹی) میں ایک بار پھر کرونا کی اسکریننگ کا عمل شروع ہو گیا۔
نمائندہ اے آر وائی نیوز کے مطابق ایس آئی یو ٹی میں کرونا کی کٹس ختم ہونے کے بعد اسکریننگ کے عمل کو عارضی طور پر روک دیا گیا تھا البتہ سندھ حکومت نے دوبارہ کٹس فراہم کردیں۔
سندھ انسٹی ٹیوٹ آف یورولوجی اینڈ ٹرانسپلانٹ میں کرونا سے متعلق مفت کلینک کا آغاز 18 مارچ سے ہوا جس کے بعد سے شہریوں کی بالکل مفت معاونت کی جارہی ہے۔
مزید پڑھیں: کراچی میں کرونا وائرس کے سب سے زیادہ کیسز کہاں ہوئے؟
ایس آئی یوٹی اب تک1258افراد کا معائنہ کیا گیا جن میں سے 1257 مریضوں کے ٹیسٹ نیگٹیو آئے جبکہ صرف ایک مریض کو وائرس کی تشخیص ہوئی تھی۔
ایس آئی یوٹی کی انتظامیہ نے کرونا وائرس کی تشخیص کرنے والی کٹس فراہم کرنے پر سندھ حکومت کا شکریہ ادا کیا اور تعاون کو مثالی قرار دیا۔
ڈاکٹر ادیب رضوی کا کہنا تھا کہ ٹیسٹ کی تمام سہولیات عالمی ادارۂ صحت کے وضع کردہ اصولوں و ضوابط کے مطابق فراہم کی جارہی ہیں۔ اُن کا کہنا تھا کہ ابھی تک کوئی بھی وبا کے خاتمے کے نتیجے پر نہیں پہنچ سکا، ایس آئی یو ٹی میں پہلے سے زیر علاج مریض دیگر بیماریوں کے باعث زیادہ خطرے میں ہیں۔
