اسلام آباد : سپریم کورٹ کے پہلے آئینی بینچ نے سماعت کا آغاز کر دیا، جسٹس امین الدین خان کی سربراہی میں بینچ اٹھارہ مقدمات سنے گا۔
تفصیلات کے مطابق سپریم کورٹ کے پہلے 6 رکنی آئینی بینچ نے سماعت کا آغاز کر دیا، جسٹس امین الدین خان کی سربراہی میں بینچ اٹھارہ مقدمات سنے گا۔
جسٹس جمال مندوخیل،جسٹس محمد علی مظہر ، جسٹس حسن اظہررضوی،جسٹس نعیم اختر افغان اورجسٹس مسرت ہلالی آئینی بینچ میں شامل ہیں۔
پی ڈی ایم حکومت میں ہونے والی قانون سازی کالعدم قرار دینے اور ملک کا لوٹا گیا پیسہ دیگر ملکوں سے واپس لانے کےلیے درخواست سماعت کےلیے مقرر ہے۔
اس کے علاوہ بیرون ملک کاروبار اور اثاثے رکھنے والے ارکان اسمبلی کی نااہلی ، سرکاری افسران کی غیرملکیوں سےشادی پر پابندی کےلیےدائر درخواست کی سماعت بھی آج ہوگی۔
دفاتر میں خواتین کو ہراساں کرنے سےمتعلق مقدمات بھی آج سماعت کے لیے مقرر کیے گئے ہیں جبکہ پی ڈی ایم حکومت میں ہونے والی قانون سازی کالعدم قرار دینے کی درخواست پر بھی سماعت ہوگی۔
اس کے علاوہ سپریم کورٹ نے ماحولیاتی آلودگی سے متعلق مقدمات سماعت کیلئے مقرر کر دیے ہیں، ماحولیاتی آلودگی سے متعلق مقدمات 1993، 2003 اور 2018 کے ہیں۔
سابق چیف جسٹس قاضی فائز عیسیٰ کی بطور چیف جسٹس بلوچستان ہائی کورٹ تعیناتی کے معاملے پر سپریم کورٹ نے ریاض حنیف راہی کی نظرثانی درخواست بھی سماعت ہوگی، سابق چیف جسٹس ثاقب نثارکی سربراہی میں تین رکنی بنچ نے تعیناتی کے خلاف درخواست خارج کی تھی۔
