کراچی : سول ایوی ایشن اتھارٹی نے سیاحت کے فروغ کیلئے اسکردو ایئرپورٹ کو عالمی معیار کا بنانے کیلئے اقدامات شروع کر دیئے۔
اے آر وائی نیوز نے گفتگو کرتے ہوئے ڈائریکٹر جنرل سی اے اے خاقان مرتضٰی نے بتایا کہ سول ایوی ایشن اتھارٹی نے سیاحت کے فروغ کیلئے اسکردو ایئرپورٹ کیلئے اوپن اسکائی پالیسی کا منصوبہ بنایا ہے۔
اس حوالےسے اسکردو ایئرپورٹ کو عالمی معیار کا بنانے کیلئے اقدامات کا آغاز کردیا ہے، موسم سرما میں بھی اسکردو اور شمالی علاقہ جات کو سیاحت کا مرکز بنانا چاہتے ہیں۔
انہوں نے بتایا کہ گزشتہ دنوں پاکستان کے دورے پر آئے ہوئے سعودی ایوی ایشن حکام نے شمالی علاقہ جات کی خوبصورتی دیکھ کر خوشگوار حیرت کا اظہار کیا تھا۔
خاقان مرتضٰی نے کہا کہ سعودی حکام نے اسکردو کیلئے براہ راست پروازوں میں گہری دلچسپی ظاہر کی ہے، کئی غیرملکی ایرلائنز اسکردو کیلئے براہ راست پروازیں شروع کرنا چاہتی ہیں۔
ڈی جی سی اے اے کا کہنا تھا کہ اسکردو ایئرپورٹ پر طیاروں کی ری فیولنگ کی سہولت فراہم کردی گئی ہے۔ شمالی علاقہ جات میں طیاروں کیلئے تیل کے ذخیرہ بڑھانے کیلئے بھی اقدامات کر رہے ہیں۔
ایک سوال کے جواب میں ان کا کہنا تھا کہ اسکردو ایئرپورٹ پر موسم سرما میں جب درجہ حرارت منفی ہوتا ہے اس لیے طیاروں کیلئے خصوصی ایندھن کا بندوبست کیا جا رہا ہے۔
انہوں نے کہا کہ اسکردو آنے والی پروازوں سے دنیا کی بلند ترین چوٹیوں اور دلکش جھیلوں کے نظارے بھی دیکھنے کو ملیں گے۔
ڈی جی سی اے اے نے کہا کہ 7ہزار فٹ اونچائی پر واقع اسکردو ایئرپورٹ کا شمار دنیا کے بلند اور خوبصورت ترین ایئرپورٹ میں شمار ہوتا ہے
ذرائع کے مطابق اسکردو ایئرپورٹ پر مرکزی ون وے پر جہازوں کو اتارنے اور اڑانے کیلئے 12ہزار فٹ جبکہ دوسرے رن وے کی گنجائش 8ہزار 5 سو فٹ ہے۔
شمالی علاقہ جات میں سیاحوں کیلئے اعلیٰ معیار کے ہوٹل اور رہائش گاہوں کی شدید ضرورت ہے۔ ایک وقت میں چند سو غیرملکی سیاح آجائیں تو ان کیلئے اسکردو میں ہوٹل دستیاب نہیں ہوتا۔
انہوں نے مزید کہا کہ سی اے اے شمالی علاقہ جات میں سیاحت کے فروغ میں سرمایہ کاری کیلئے تیار ہے، طیاروں کی بڑھتی ہوئی آمد و رفت کے پیش نظر اسکردو ایئرپورٹ کے رن وے کی توسیع کی جا رہی ہے۔
