بھارتی کپتان روہت شرما لیگ سلپ میں کھڑے سرفراز خان کے کہنے کے باوجود ڈی آر ایس نہ لے کر غلط ثابت ہوگئے۔
یہ واقعہ 26 ویں اوور میں رونما ہوا جب اوپنر زیک کرولی لیگ اسپنر کلدیپ یادیو کا سامنا کررہے تھے۔ روہت نے لیگ سائیڈ پر بیٹر کے قریب ہی ایک فیلڈر کو کھڑا کرنے کا فیصلہ کیا۔ سرفراز کو لیگ سلپ اور شارٹ لیگ کے درمیان کھڑا کیا گیا۔
اس وقت انگلش اوپنر61 رنز پر کھیل رہے تھے کہ کلدیپ کی ایک ڈیلیوری ان کے بیٹ اور پیڈ نہایت معمولی کنارہ لیتی ہوئی سرفراز کی طرف گئی۔
بھارتی فیلڈر نے ڈائیو لگاتے ہوئے پھرتی سے کیچ تھام لی اور فوراً ہی جشن منانا شروع کر دیا تاہم اس وقت الجھن پیدا ہوگئی جب وکٹ کیپر دھروو جوریل ان کی بات پر قائل نہیں ہوئے۔
اس دوران روہت شرما بھی ان کے قریب آئے تو سرفراز نے انھیں بتایا کہ یہ آؤٹ ہے اور ڈی آر ایس سے استفادہ کیا جائے مگر بھارتی کپتان نہ مانے اور ڈی آر ایس کا وقت گزر گیا۔
بعدازاں ری پلے میں الٹرا ایج سے ظاہر ہوا کہ یہ آؤٹ تھا جس سے سرفراز کی بات سچ ثابت ہوگئی۔ اس دوران بھارتی فیلڈر نے کپتان کی طرف مسکراتے ہوئے دیکھا، جنھوں نے اپنی غلطی تسلیم کرتے ہوئے ان کی طرف انگوٹھا لہرایا۔
