عَمّان: اردن میں ایک ریستوران نے خصوصی ڈش کے ساتھ ایک ایسی پیشکش کر دی ہے جس نے ملک میں ہلچل مچا دی۔
عرب میڈیا اور سوشل میڈیا پوسٹس کے مطابق اردن کے دارالحکومت عمان میں چھ ماہ قبل کھلنے والے ایک ریستوران نے اپنی اسپیشل ڈش کے ساتھ ریستوران ہی میں سونے کی سہولت بھی فراہم کر دی ہے۔
ریستوران کے مالک کے بیٹے عمر المبیضین کا کہنا تھا کہ المنسف ایک عوامی ڈش ہے، اس میں سیاح اور روایت پسند لوگ بے حد دل چسپی لے رہے ہیں، انھوں نے کہا کہ گاہک جب المنسف ڈش کھاتے ہیں تو ہم نے دیکھا کہ وہ تکان محسوس کرنے لگ جاتے ہیں، اور انھیں اونگھ آ جاتی ہے۔
معطم في العاصمة الأردنية عمّان بدأ بتوفير غرفة للنوم بعد أكل المنسف، حيث كتب المطعم في حسابه بالفيسبوك: نظرًا لمعاناة الزبائن من النعاس بعد تناول وجبة المنسف، تم توفير خدمة (تغدى واتمدى). pic.twitter.com/Czf58KGOYC
— إياد الحمود (@Eyaaaad) July 13, 2023
عمر نے بتایا کہ اس سے انھیں یہ خیال آیا کہ کیوں نہ گاہکوں کو یہ پیش کش کی جائے کہ المنسف ڈش کھانے والوں کو ریستوران میں سونے کی سہولت بھی دی جائے گی۔
دل چسپ بات یہ ہے کہ اس معاملے کی شروعات ایک مذاق کے طور پر ہوئی تھی، عمر کے مطابق ان کا ریستوران چوں کہ المنسف ڈش کے لیے مشہور ہے، تو جب انھوں نے یہ پیشکش کی تو سوشل میڈیا پر یہ تیزی سے وائرل ہو گئی۔
عمر المبیضین کا کہنا تھا کہ اس پیشکش کے بعد سے ریستوران کی مقبولیت میں بے پناہ اضافہ ہو چکا ہے۔
