ٹیکساس: امریکی ریاست ٹیکساس میں مسافر بردار طیارہ ہنگامی لینڈنگ کے دوران گر کر تباہ ہوگیا جس کے نتیجے میں 4 افراد ہلاک ہوگئے۔
غیرملکی خبررساں ادارے کی رپورٹ کے مطابق امریکی ریاست ٹیکساس کے ہل ٹاپ لیکس ایئرپورٹ پر ایک انجن والا طیارہ فنی خراب کے باعث ہنگامی لینڈنگ کے دوران صبح 10 بجکر 50 منٹ پر گر کر تباہ ہوگیا۔
ٹیکساس ڈپارٹمنٹ آف پبلک سیفٹی (ڈی پی ایس) کے ترجمان کے مطابق طیارہ حادثے کے نتیجے میں 2 مرد اور 2 خواتین ہلاک ہوئے ہیں، طیارہ آسٹن سے اڑان بھرکے لوزیانا واپس آرہا تھا۔
طیارے کے ملبے سے چاروں افراد کی لاشیں نکال کر اسپتال منتقل کردیا گیا ہے تاہم ہلاک ہونے والے افراد کی شناخت نہیں ہوسکی۔
NTSB is investigating the September 20, 2020 crash in Hilltop, TX involving a Piper PA-46. The NTSB is not traveling to the scene of the crash at this time.
— NTSB_Newsroom (@NTSB_Newsroom) September 20, 2020
رپورٹ کے مطابق فیڈرل ایوی ایشن نے حادثے کی تحقیقات کے لیے انکوائری کمیٹی تشکیل دے دی ہے۔
واضح رہے کہ چند روز قبل امریکی ریاست مونٹانا میسولا کاؤنٹی کے نارتھ سیلی لیک ایئرپورٹ سے اڑان بھرنے والا مسافر بردار طیارہ زمیں بوس ہوگیا تھا جس کے نتیجے میں ایک پائلٹ اور مسافر ہلاک اور ایک شخص زخمی ہوگیا تھا۔
خیال رہے کہ رواں ماہ میں امریکا میں طیارہ حادثے کا یہ تیسرا واقعہ ہے، اس سے قبل ریاست ورمونٹ میں طیارہ حادثے میں 2 افراد زخمی ہوگئے تھے۔
