The news is by your side.

Advertisement

امریکا: طیارہ گر کر تباہ، 2 افراد زخمی

ورمونٹ: امریکی ریاست ورمونٹ کے ایک علاقے میں طیارہ گر کر تباہ ہونے سے 2 افراد شدید زخمی ہو گئے۔

غیر ملکی میڈیا کے مطابق یہ واقعہ جمعرات کو ریاست ورمونٹ کے علاقے مورس ٹاؤن میں پیش آیا، پولیس کا کہنا ہے کہ واقعے میں دو افراد شدید زخمی ہوئے ہیں جنھیں اسپتال میں طبی امداد دی جا رہی ہے۔

مقامی پولیس کے مطابق دونوں زخمیوں کا تعلق نیو یارک سے ہے، تاہم ان کی شناخت فی الحال چھپائی جا رہی ہے، کیوں کہ تاحال ان کے خاندانوں کے ساتھ رابطہ نہیں ہو سکا ہے۔

حادثے کے بعد زخمیوں کو ہیلی کاپٹر میں ورمونٹ یونی ورسٹی اسپتال پہنچایا گیا تھا، ابتدائی تحقیقات سے معلوم ہوا ہے کہ دونوں افراد طیارہ اڑا رہے تھے، اس دوران وہ ٹچ اینڈ گو لینڈنگ کی پریکٹس (رن وے پر اترنے کے فوراً بعد پھر اڑان بھرنا) کر رہے تھے، پولیس نے بتایا کہ ایسا لگتا ہے جیسے وہ رن وے یا قریبی لان میں اترنا چاہ رہے تھے اور اس دوران طیارہ کریش ہو گیا۔

پولیس جب جائے وقوعہ پر پہنچی تو دونوں شدید زخمی تھے، فائر فائٹرز نے طیارے کی باڈی کاٹ کر دونوں کو باہر نکالا، اور زخمیوں کو حادثے کے محض 15 منٹ کے اندر اسپتال پہنچا دیا گیا۔

فیڈرل ایوی ایشن ایڈمنسٹریشن کا کہنا تھا کہ طیارہ سنگل انجن سیسنا 170 تھا، جسے مورس وِل اسٹو اسٹیٹ ایئرپورٹ پر رکھا گیا ہے۔

Comments

یہ بھی پڑھیں