آپ نے مشہور و معروف ہیری پوٹر فلم سیریز تو ضرور دیکھی ہوگی، کیا آپ کو اس کے پہلے حصے کا وہ سین یاد ہے جس میں ہیری پوٹر اور اس کا دوست رون ایسا شطرنج کھیلتے ہیں جس کے مہرے خود بخود آگے بڑھتے ہیں۔
ایسا شطرنج حقیقی دنیا میں بھی تیار کرلیا گیا ہے جو خود بخود حرکت کرتا ہے۔
یہ دراصل اسمارٹ شطرنج ہے جسے لاس ویگاس میں جاری سی ای ایس نمائش میں متعارف کروایا گیا۔ اسکوائر آف گرینڈ کنگڈم چیس بورڈ آرٹی فیشل انٹیلی جنس سے لیس ہے اور کہیں بھی بیٹھے افراد اسمارٹ فون کی مدد سے آن لائن اسے کھیل سکتے ہیں۔
اس کے لکڑی کے بورڈ کے نیچے ایک روبوٹک ہاتھ موجود ہے جو یہ کام کرتا ہے۔ اسے کھیلنے کے لیے آپ کو کسی مہرے کو نیچے دبانا ہوگا جس پر ایک بیپ سنائی دے گی اور پھر مہرے کو اپنی پسند کی جگہ پر رکھ کر دبانے پر ایک اور بیپ سنائی دے گی۔
حیران کن منظر وہ ہوتا ہے جب آپ کے سامنے کوئی نہیں ہوتا مگر مخالف مہرے حرکت میں آجاتے ہیں۔ کسی گیم کو شروع کرنے کے لیے بورڈ کی سائیڈ میں موجود ایک بٹن کو دبانا ہوتا ہے اور پھر کھیل جادوئی ہوجاتا ہے۔
کمپنی کے مطابق اس بورڈ پر کھلاڑی بلیو ٹوتھ کے ذریعے کنیکٹ ہوسکتے ہیں اور ہر وہ شخص اسے کھیل سکتا ہے جس کے پاس اسکوائر ایپ ہو۔
شطرنج کا یہ جادوئی بورڈ 369 ڈالرز میں فروخت ہوگا۔
