لاہور: صوبہ پنجاب کے دارالحکومت لاہور کے ہائی رسک علاقوں میں اسمارٹ سیمپلنگ کی گئی جس میں 112 افراد کرونا پازیٹو نکلے، 48 ہزار 260 افراد کے ٹیسٹ کی رپورٹ آنا باقی ہے۔
تفصیلات کے مطابق صوبہ پنجاب کے دارالحکومت لاہور کے ہائی رسک علاقوں میں کی جانے والی اسمارٹ سیمپلنگ کی رپورٹ جاری کردی گئی، 39 روز میں 1 لاکھ 21 ہزار 70 ٹیسٹ کیے گئے۔
رپورٹ کے مطابق اسمارٹ سیمپلنگ میں 112 افراد کرونا وائرس پازیٹو نکلے، 72 ہزار 707 افراد کے ٹیسٹ نیگیٹو آئے، 48 ہزار 260 افراد کے ٹیسٹ کی رپورٹ آنا باقی ہے۔
سی ای او ہیلتھ ڈاکٹر شعیب گرمانی کا کہنا ہے کہ کرونا وائرس کے پھیلاؤ میں کمی تاحال برقرار ہے، اسمارٹ سیمپلنگ شہر کے بازاروں، مارکیٹس اور سرکاری و نجی دفاتر میں کی جارہی ہے۔
خیال رہے کہ ملک بھر میں کرونا وائرس کیسز کی مجموعی تعداد 3 لاکھ 5 ہزار 31 ہوچکی ہے جن میں سے فعال کیسز کی تعداد 6 ہزار 572 ہے۔
کرونا وائرس سے جاں بحق افراد کی تعداد 6 ہزار 415 ہوگئی ہے جبکہ ملک بھر میں کرونا وائرس کے 2 لاکھ 92 ہزار 44 مریض صحتیاب ہوچکے ہیں۔
