کوئٹہ : بلوچستان میں کسٹم اور قانون نافذ کرنے والے اداروں نے اشیائے ضروریہ کی بیرون ملک اسمگلنگ کے خلاف کارروائیوں میں ایک ہفتے کے دوران چینی اور یوریا کی چھیاسی ہزار سے زائد بوریاں قبضہ میں لے لیں۔
کسٹم حکام کے مطابق چینی یوریا اور دیگر ضروری اشیاء کی بیرون ملک اسمگلنگ کی اطلاعات پر وزیراعظم پاکستان کی ہدایت کے نتیجے میں کسٹم بلوچستان نے قانون نافذ کرنیو الے اداروں کے ساتھ مل کر سرچ اور ٹیمیں تشکیل دیں جنہوں نے خضدار، گڈانی، نوشکی اور دیگر علاقوں میں اسمگلنگ کے خلاف کارروائیاں شروع کیں۔
خضدار میں ایک فارم ہاؤس پر چھاپے کے دوران یوریا کی 26407جبکہ چینی کی 8209بوریں برآمد کرکے قبضے میں لی گئیں، خضدار میں ایک اور کارروائی کے دوران ایک کمپاؤنڈ سے10630بوری یوریا اور 3770بوری چینی برآمد کرکے تحویل میں لے گئی۔
اسی طرح کارروائیاں جاری رکھتے ہوئے خضدار میں ہی قومی شاہراہ پر واقع ہوٹل کے قریب نوتعمیر شدہ مارکیٹ کی33 دوکانوں سے22ہزار 978بوری چینی اور یوریا کی دو ہزار646بوریاں تحویل میں لیکر کارروائی شروع کردی گئی۔
اس دوران مقامی لوگوں نے احتجاج کرتے ہوئے قومی شاہراہ بھی بلاک کی تاہم مقامی انتظامیہ اور سیکورٹی فورسز نے مظاہرین کی منتشر کردیا۔
قبل ازیں دو مختلف کارروائیوں میں کسٹم انٹیلی جنس نے نوشکی اور گڈانی میں 10ہزار بوری چینی اور 2200بوری یوریا قبضہ میں لی تھی، بتایا گیا ہے کہ چینی اور یوریا سمیت دیگر اشیائے ضروریہ مختلف مقامات پر ذخیرہ کرکے افغانستان سمیت دیگر ہمسایہ ممالک کو اسمگل کی جانی تھی، کسٹم حکام کا کہنا ہے کہ اسمگلنگ کے خلاف کارروائیاں جاری رہیں گی۔
