کراچی: اینٹی اسمگلنگ اسکواڈ (اے ایس او) نے کراچی میں ایک کارروائی میں 55 ہزار کلو گرام پلاسٹک سلنگ فلم ضبط کر لی۔
تفصیلات کے مطابق کسٹمز انفورسمنٹ کے اینٹی اسمگلنگ اسکواڈ نے خفیہ اطلاع پر کراچی کے علاقے کورنگی میں ایک کامیاب کارروائی میں انڈسٹریل ایریا کے ایک گودام پر چھاپا مارا، اور اسمگل شدہ ممنوعہ 55000 کلو گرام پلاسٹک سلنگ فلم برآمد کر لی۔
اسمگلنگ کے خلاف کی گئی اس کارروائی میں جو اسمگل شدہ پلاسٹک سلنگ فلم ضبط کی گئی ہے اس کی مالیت 4 کروڑ 80 لاکھ روپے بتائی جاتی ہے۔
ڈپٹی کلکٹر کسٹمز محمد رضا نقوی کے مطابق ضبط شدہ پلاسٹک سلنگ فلم کو ٹرک کے ذریعے ASO کے گودام منتقل کر دیا گیا ہے، جب کہ کسٹمز ایکٹ کے تحت مقدمہ درج کر کے مزید تفتیش کی جا رہی ہے۔
