کیلیفورنیا: امریکا اور برطانیہ سمیت یورپ بھر میں ہر طرف برف اور ٹھنڈ کا راج شروع ہو گیا ہے۔
عالمی میڈیا رپورٹس کے مطابق برطانوی محمکہ موسمیات نے خبردار کیا ہے کہ آنے والے دنوں میں ملک میں شدید برف باری، ژالہ باری، اور دھند کی پیش گوئی ہے، درجہ حرارت منفی دس ڈگری سینٹی گریڈ تک جائے گا۔
برف باری آنے والے دنوں میں برطانیہ کے کچھ حصوں میں سفری رکاوٹوں کا باعث بھی بن سکتی ہے۔
اسکاٹ لینڈ، مغربی ویلز، لندن اور جنوب مشرقی انگلینڈ کے بیش تر حصوں میں برف باری کی واننگ جاری کر دی گئی ہے، سوئٹزرلینڈ میں بھی موسمِ سرما کی پہلی برف باری ہونے کے بعد ہر سو سفیدی چھا گئی۔
ادھر امریکی ریاستوں واشنگٹن اور کیلیفورنیا میں برف باری کے باعث نظامِ زندگی درہم برہم ہو گیا ہے، اور اہم شاہراہوں کو بند کر دیا گیا۔
برطانیہ میں مقامی کونسلوں اور خیراتی اداروں نے پورے برطانیہ میں 3,200 سے زیادہ ’گرم بینک‘ کھولے ہیں، تاکہ ان لوگوں کو گرم رکھنے میں مدد ملے جو اپنے گھروں کو گرم رکھنے کے متحمل نہیں ہو سکتے۔
امریکی محکمہ موسمیات کے مطابق موسم سرما کا ایک بڑا طوفان ہفتے کے آخر تک کیلیفورنیا اور مغرب کو اپنی لپیٹ میں لے لے گا، جو بعد میں شمالی میدانی برفانی طوفان بن جائے گا، اور پھر اگلے ہفتے کے آخر میں شمال مشرق کے کچھ حصوں میں برف باری ہو سکتی ہے۔
