پشاور: خیبر پختون خوا کے نئے سیاحتی مقام گبین جبہ میں 3 روزہ اسنو فیسٹیول کا اختتام ہو گیا۔
اے آر وائی نیوز کے مطابق 8 ہزار سے زائد بلندی پر واقع نئے سیاحتی مقام گبین جبہ میں خیبر پختون خوا کلچر اینڈ ٹورازم اتھارٹی کی جانب سے منعقدہ تین روزہ اسنو اسپورٹس اینڈ کلچر فیسٹیول اختتام کو پہنچ گیا۔
فیسٹیول میں ملک بھر سے بڑی تعداد میں سیاحوں نے شرکت کی، گبین جبہ میں پہلی بار اسنو فیسٹیول کا انعقاد کیا گیا تھا۔
اس برف میلے میں جہاں سیاح گبین جبہ کے خوب صورت نظاروں سے محظوظ ہوئے، وہاں برف میں کھیل کے مقابلے اور موسیقی بھی سیاحوں کو اپنی طرف راغب کر رہے تھے۔
اسنو اسپورٹس اینڈ کلچر فیسٹیول میں ہائکنگ، رسہ کشی، جوڈو کراٹے، تیر اندازی، ٹیک بال، بیڈ منٹن، میراتھن اور دیگر کئی مقابلوں کا انعقاد کیا گیا۔
محکمہ سیاحت کے مطابق مقابلوں میں پوزیشن حاصل کرنے والے کھلاڑیوں میں انعامات تقسیم کیے گئے، فیسٹیول میں روایتی موسیقی کا بھی اہتمام کیاگیا، جس میں نامور گلوکاروں نے پرفارمنس پیش کی۔
خیبر پختون خوا کے سیاحتی مقامات میں مختلف فیسٹیولز اور دیگر سرگرمیوں کے انعقاد سے ملک بھر سے بڑی تعداد میں لوگ سیر و تفریح کے لیے اب ان علاقوں کا رخ کر رہے ہیں۔
محکمہ سیاحت خیبر پختون خوا کے مطابق کرونا لاک ڈاؤن ختم ہونے کے بعد اگست کے مہینے سے اب تک 28 لاکھ سے زائد سیاحوں نے ملاکنڈ ڈویژن کے سیاحتی مقامات کا رخ کیا۔
14 لاکھ سے زائد سیاحوں نے سوات، 8 لاکھ سیاحوں نے چترال، شانگہ 2 لاکھ، جب کہ لوئر اور اپر دیر کے نظارے دیکھنے کے لیے 4 لاکھ سیاح آئے۔
