نئی دہلی: بھارتی فوجیوں کو ملنے والے ناقص کھانے کی شکایت کرنے والے بھارتی فوج کے کانسٹیبل تیج بہادر یادیو کا جواں سال بیٹا ریاست ہریانہ میں واقع اپنی رہائش گاہ پر مردہ پایا گیا۔
غیرملکی خبررساں ادارے کے مطابق ناقص کھانے کی شکایت کرنے والے بھارتی بارڈر سیکیورٹی فورس کے جوان تیج بہادر یادیو کا جواں سال بیٹا بھارتی ریاست ہریانہ میں واقع اپنی رہائش گاہ میں مردہ پایا گیا ہے۔
بھارتی میڈیا رپورٹس کے مطابق ایک پولیس کا کہنا ہے کہ ضلع ریواڑی کے علاقے شانتی وہاڑ کے علاقے کے رہائشی 22 سالہ روہت نے مبینہ طور پر اپنے کمرے میں خود کو گولی مار کر خودکشی کی ہے۔
پولیس افسر کے مطابق روہت کا کمرہ اندر سے بند تھا، وہ بستر پر موجود تھا اور اس کے ساتھ پستول موجود تھا، نوجوان کے والد تیج بہادر کمبھ میلے میں شرکت کے لیے گئے ہوئے تھے جنہیں مطلع کردیا گیا ہے۔
مزید پڑھیں: بھارتی فوجیوں کی حالتِ زارآشکار کرنے والاسپاہی نوکری سے برطرف
واضح رہے کہ 2017 میں بی ایس ایف کی 29 بٹالین سے تعلق رکھنے والے کانسٹیبل تیج بہادر یادیو نے سوشل میڈیا پر پوسٹ کی گئی ویڈیو میں کہا تھا کہ سرحد پر تعینات فوجیوں کو ناقص معیار کا کھانا فراہم کیا جاتا ہے بلکہ کبھی کبھار تو وہ بھوکے ہی سو جاتے ہیں۔
مذکورہ ویڈیو وائرل ہونے کے بعد تیج بہادر کے خلاف انکوائری کی گئی تھی اور رپورٹس سامنے آنے کے بعد انہیں کنٹرول لائن سے ہٹا کر ہیڈ کوارٹر میں پلمبر لگادیا گیا تھا۔
بعدازاں تیج بہادر کو تصویر سوشل میڈیا پر وائرل کرنے کا جرم ثابت ہونے پر ضابطہ اخلاق ورزی کے جرم میں ملازمت سے برطرف کردیا تھا۔
