The news is by your side.

سونالی پھوگاٹ کی موت سے چند لمحے قبل کی ویڈیو سامنے آگئی

گوا میں مبینہ طور پر قتل ہونے والی اداکارہ اور بھارتیہ جنتا پارٹی (بی جے پی) کی رہنما سونالی پھوگاٹ کی موت سے چند لمحے قبل کی ویڈیو سامنے آگئی۔

یہ ویڈیو گوا کے ایک مشہور ریسٹورنٹ کے سی سی ٹی وی کی ہے جہاں سونالی پھوگاٹ نے موت سے قبل پارٹی کی تھی، اس موقع پر ان کے دو معاونین بھی ساتھ موجود تھے۔

سی سی ٹی وی فوٹیج میں دیکھا جا سکتا ہے کہ سونالی پھوگاٹ کو نیم بے ہوشی کی حالت میں ان کا ایک معاون ریسٹورنٹ سے لے جا رہا ہے جبکہ دوسرا معاون بھی ساتھ ہے۔

قبل ازیں گوا پولیس نے سونالی پھوگاٹ کی موت سے متعلق انکشاف کیا کہ بی جے پی رہنما کو ان کے معاونین نے زبردستی نشہ آور مشروب پلایا جس کا ملزمان نے اعتراف بھی کرلیا ہے۔

پولیس کے مطابق ملزمان نے انہیں مشروب پلانے کے بعد باتھ روم میں دو گھنٹے کے لیے بند کر دیا تھا۔

سونالی پھوگاٹ 22 اگست کو معاونین کے ساتھ گوا آئی تھی اور انجونا میں واقع ایک ہوٹل میں ٹھہری تھیں۔ 23 اگست کی صبح خرابی صحت کی شکایت کے بعد انہیں سینٹ انتھونی اسپتال لے جایا گیا لیکن وہ وہاں پہنچنے سے پہلے ہی دم توڑ گئی تھیں۔

ڈاکٹروں نے ان کی موت دل کا دورہ پڑنے سے ہونے کا امکان ظاہر کیا تھا تاہم پوسٹ مارٹم میں یہ بات سامنے آئی ہے کہ سونالی کے جسم پر زخموں کے کئی نشانات تھے۔

Comments

یہ بھی پڑھیں