لاہور :پنجاب میں عیدالاضحیٰ پر مویشی منڈیوں کے حوالے سے ایس اوپیز جاری کردی گئی، جس میں منڈیوں میں بچوں کے آنے پرپابندی عائد کی گئی ہے اور آنیوالے افراد کیلئے ماسک پہننالازمی قرار دیا ہے۔
تفصیلات کے مطابق عیدالاضحیٰ پر پنجاب میں مویشی منڈیوں کے حوالے سے ایس اوپیز جاری کردی ، محکمہ پرائمری اینڈ سیکنڈری ہیلتھ کیئر نے ایس او پیز جاری کئے۔
ایس اوپیز کے مطابق مویشی منڈیا ں شہر سے 2 سے 5 کلومیٹردورلگائی جائیں گی اور مویشی منڈیوں میں بچوں کے آنے پر پابندی ہوگی جبکہ مویشی منڈی میں ڈس انفیکٹ ٹنل نصب کرنے پر پابندی عائد ہوگی۔
محکمہ پرائمری اینڈ سیکنڈری ہیلتھ کیئر کا کہنا ہے کہ مویشی منڈیوں میں کھانے کے اسٹالز نہیں لگیں گے اور منڈی آنیوالے افراد کو ماسک پہننا لازمی ہو گا جبکہ منڈیوں کے داخلی راستوں پر تھرمل اسکریننگ ہوگی اور میڈیکل کیمپ بھی لگائے جائیں گے۔
دوسری جانب لاہور میں ضلعی حکومت نے 14 مقامات پر مویشی منڈیاں لگانے کی منظوری دے دی ہے تاہم بچوں اور 50 سال سے زائدعمر کے افراد کو مویشی منڈی آنے کی اجازت نہیں ہوگی۔
چیف کارپوریشن آفیسر کا کہنا ہے کہ مویشی منڈیوں میں سماجی فاصلوں کو یقینی بنانے کی ذمہ داری فروخت کنندگان پر ہوگی،مویشی منڈیوں میں ایس اوپیز کی خلاف ورزی پر سخت ایکشن ہوگا۔
