قومی سلیکشن کمیٹی نے دورہ جنوبی افریقہ کے لیے پاکستانی ٹیم کے تینوں فارمیٹس کے الگ الگ اسکواڈز کا اعلان کر دیا ہے بابر اعظم تینوں اسکواڈ میں شامل ہیں۔
قومی سلیکشن کمیٹی نے رواں ماہ 10 دسمبر سے شروع ہونے والے دورہ جنوبی افریقہ میں کھیلے جانے والے کرکٹ کے تینوں فارمیٹس کے لیے 15، 15 رکنی پاکستانی اسکواڈ کا اعلان کر دیا ہے۔ بابر اعظم، محمد رضوان، سلمان علی آغا، صائم ایوب تینوں فارمیٹس کے اسکواڈ میں شامل کیا گیا ہے۔
ٹیسٹ ٹیم کی قیادت شان مسعود کریں گے جب کہ ون ڈے اور ٹی ٹوئنٹی میں محمد رضوان یہ ذمے داری نبھائیں گے۔
ٹیسٹ ٹیم کے کپتان شان مسعود اور نائب کپتان سعود شکیل کو ون ڈے اور ٹی 20 اسکواڈ میں شامل نہیں کیا گیا ہے۔ شاہین شاہ آفریدی کو ٹیسٹ اسکواڈ جب کہ نسیم شاہ کو ٹی 20 اسکواڈ سے باہر کیا گیا ہے۔ سفیان مقیم کو پہلی بار ون ڈے اسکواڈ میں شامل کیا گیا ہے۔ محمد عباس آفریدی کی ٹیسٹ اسکواڈ میں واپسی ہوئی ہے۔
قومی سلیکشن کمیٹی کے اعلان کردہ اسکواڈ یہ ہیں۔
ٹی 20 اسکواڈ:
شان مسعود (کپتان)، سعود شکیل (نائب کپتان)، عامر جمال، عبداللہ شفیق، بابر اعظم، حسیب اللہ، کامران غلام، خرم شہزاد، میر حمزہ، محمد عباس، محمد رضوان، نسیم شاہ، نعمان علی، صائم ایوب، سلمان علی آغا۔
ون ڈے اسکواڈ:
محمد رضوان (کپتان)، سلمان علی آغا (نائب کپتان)، عبداللہ شفیق، ابرار احمد، بابر اعظم، حارث رؤف، کامران غلام، محمد حسنین، محمد عرفان خان، نسیم شاہ، صائم ایوب، شاہین شاہ آفریدی، سفیان مقیم، طیب طاہر اور عثمان خان (وکٹ کیپر)۔
ٹی ٹوئنٹی اسکواڈ:
محمد رضوان (کپتان)، سلمان علی آغا (نائب کپتان)، ابرار احمد، بابر اعظم، حارث رؤف، جہاںداد خان، محمد عباس آفریدی، محمد حسنین، محمد عرفان خان، عمیر بن یوسف، صائم ایوب، شاہین شاہ آفریدی، سفیان مقیم، طیب طاہر اور عثمان خان (وکٹ کیپر)۔
View this post on Instagram
واضح رہے کہ پاکستان رواں ماہ 10 دسمبر سے 7 جنوری تک جنوبی افریقہ کا دورہ کرے گا۔ اس سیریز کے دوران قومی ٹیم تین ٹی ٹوئنٹی، تین ون ڈے اور دو ٹیسٹ میچز پر مبنی سیریز کھیلے گی۔
پاکستان اپنے دورے کا آغاز 10 دسمبر کو ڈربن میں ٹی ٹوئنٹی میچ سے کرے گی۔ اسی فارمیٹ کا دوسرا میچ 13 دسمبر کو سنچورین اور آخری میچ 14 دسمبر کو جوہانسبرگ میں کھیلا جائے گا۔
تین ون ڈے میچوں کی سیریز 17 سے 22 دسمبر تک کھیلی جائے گی جب کہ دو ٹیسٹ میچوں پر مشتمل سیریز کا پہلا میچ 26 دسمبر سے سنچورین جب کہ دوسرا اور آخری میچ 3 جنوری 2025 سے کیپ ٹاوٌن میں کھیلا جائے گا۔
ریڈ بال ہیڈ کوچ جیسن گلیسپی 13 دسمبر کو جوہانسبرگ پہنچیں گے۔ وہ ٹیسٹ سیریز کے کیمپ کی نگرانی کریں گے۔
