The news is by your side.

Advertisement

وزیراعظم نے جنوبی پنجاب کے کسانوں کو بڑی خوشخبری سنادی

اسلام آباد: وزیراعظم عمران خان نے جنوبی پنجاب کے کسانوں کے لئے خصوصی پیکج جلد تیار کرنے کی ہدایت کردی ہے۔

تفصیلات کے مطابق اسلام آباد میں وزیراعظم سے جنوبی پنجاب سے تعلق رکھنے والے اراکین قومی اسمبلی نے ملاقات کی، ملاقات کرنے والوں میں ملک عامر ڈوگر، اورنگزیب خان کھچی اور نور محمد خان بھابھا شامل تھے۔

ملاقات میں وزیراعظم نے جنوبی پنجاب سیکریٹریٹ اور کسانوں کیلئے خصوصی پیکیج پر تفصیلی گفتگو کی، اس موقع پر اورنگزیب کھچی نے وزیر اعظم کو وہاڑی میں کیڈٹ کالج کے قیام کی تجویز دی۔

ملاقات میں اراکین اسمبلی سے گفتگو کرتے ہوئے وزیراعظم عمران خان کا کہنا تھا کہ جنوبی پنجاب کو ماضی میں نظر انداز کیا گیا، یہاں تعلیم، صحت اور روزگار کے مساوی مواقع نہیں دیئے گئے، جنوبی پنجاب سیکریٹریٹ کے قیام کا اولین مقصد نظرانداز اضلاع کو ترقی کی راہ پر گامزن کرنا ہے۔

اس موقع پر وزیراعظم کا کہنا تھا کہ کابینہ کی ذیلی کمیٹی جنوبی پنجاب کے کسانوں کےلیےخصوصی پیکیج کی تجاویز تیار کر رہی ہے، کسانوں کے لیےخصوصی پیکج کا اعلان بہت جلد کیا جائے گا۔

Comments

یہ بھی پڑھیں