راولپنڈی : جنوبی وزیرستان میں شہید سیکیورٹی اہلکاروں کی نمازجنازہ ادا کردی گئی، دونوں شہداء کو پورے فوجی اعزازکے ساتھ سپرد خاک کیا گیا۔
پاک فوج کےشعبہ تعلقات عامہ (آئی ایس پی آر)کے مطابق لانس نائیک شعیب علی اورسپاہی رفیع اللہ کی نماز جنازہ وانا میں ادا کی گئی۔25 سالہ شعیب کا تعلق پارہ چنارجبکہ 22 سالہ رفیع اللہ کا لکی مروت سے تھا۔
آئی ایس پی آر کےمطابق نمازجنازہ میں بڑی تعداد میں فوجی افسران،جوانوں، سول حکام اورشہریوں نے شرکت کی۔دونوں شہداء کو آبائی علاقوں میں پورے فوجی اعزاز کے ساتھ سپرد خاک کیا گیا۔
آئی ایس پی آر کے مطابق سیکیورٹی فورسز نے ہفتہ کو جنوبی وزیرستان کے ضلع زرملان میں انٹیلی جنس پر مبنی آپریشن کیا، اس دوران فورسزاوردہشت گردوں کے درمیان شدید فائرنگ کا تبادلہ ہوا۔
واقعے میں 25 سالہ لانس نائیک شعیب علی، اور22 سالہ سپاہی رفیع اللہ بہادری سے لڑتے ہوئے شہید ہو گئے، شہداء نے سوگواران میں بیوائوں اور والدین کو غمگسار چھوڑا ہے۔
