میڈرڈ: اسپین میں کروناوائرس کی شکار ہونے والی خاتون کو قرنطینہ اصولوں کی خلاف ورزی پر پولیس نے گرفتار کرلیا، متاثرہ عورت سمندر میں سرفنگ کررہی تھی۔
غیرملکی خبررساں ادارے کی رپورٹ کے مطابق اسپینش خاتون نے کرونا کی شکار ہونے کے بعد قرنطینہ اصولوں کی پابندی نہیں کی اور موج مستی کے لیے سمندر پہنچ گئی جس پر پولیس نے گرفتار کرلیا۔
رپورٹ کے مطابق اسپین کے شہر سین سیبستن میں زوریولا نامی بیچ پر خاتون سفرنگ کررہی تھی کہ اس دوران اطلاع پر پولیس نے گرفتار کیا، مذکورہ عورت زوریولا بیچ پر ہی بحیثیت لائف گارڈ اپنے فرائض انجام دیتی ہے۔
پولیس کا کہنا ہے کہ خاتون کو دیکھ کر ان کے ساتھی لائف گارڈز حیران ہوگئے اور انہوں نے متعلقہ ادارے کو فون کر کے آگاہ کیا جس پر اہلکار فوری طور پر سمندر پہنچے اور گرفتار کرکے ساڑھے 5 ہزار پاؤنڈ کا جرمانہ عائد کردیا۔
ساحل پر پولیس اہلکاروں کو دیکھ کر خاتون نے پانی سے باہر آنے سے انکار کردیا تھا، متاثرہ عورت کے اس اقدام سے اگر کوئی شہری کرونا کا شکار ہوا تو خاتون کو ایک لاکھ پاؤنڈ تک جرمانہ بھی ہوسکتا ہے۔
