میڈرڈ: اسپین اور پرتگال کو پیر کے روز بڑے پیمانے پر بجلی کی بندش کی سامنا کرنا پڑا، جس سے دونوں ممالک میں افراتفری کی صورتحال پیدا ہوگئی۔
دونوں ممالک کے طول و عرض میں بجلی کی بڑے پیمانے پر بندش کے ساتھ ہی پبلک ٹرانسپورٹ مفلوج ہو گئی اور پبلک مقامات پر بڑے ٹریفک جام کا سامنا کرنا پڑا جبکہ پروازوں میں تاخیر ہوئی، ہسپانوی الیکٹرکستی ٹرانسمیشن آپریٹر ریڈ الیکٹریکا کے مطابق بندش کی وجہ فوری طور پر معلوم نہیں ہوسکی ہے۔
یوٹیلیٹی آپریٹرز نے گرڈ کو بحال کرنے کی کوشش کی لیکن اس میں انھیں کامیابی نہیں ملی، ٹرانسمیشن آپریٹر ریڈ الیکٹریکا نے 6 سے 10 گھنٹے تک بجلی کی بندش کا امکان ظاہر کیا ہے۔
حکام کا یہ بھی کہنا ہے کہ اس امکان کو رد نہیں کیا جاسکتا ہے کہ اتنے بڑے پیمانے پر بجلی کی بندش کے پیچھے کوئی سائبر حملہ ہوسکتا ہے۔
بجلی کی بندش سے پرتگال اور اسپین کے کئی علاقوں میں افراتفری کی صورتحال نظر آئی، اس دوران ٹریفک لائٹس نے کام کرنا چھوڑ دیا، جس سے گرڈ لاک ہوگیا، اسپتال میں بھی مریضوں کو کافی مشکلات پیش آئیں جبکہ لوگ میٹرو اور لفٹوں میں پھنس گئے۔
بجلی کی اس بندش نے فرانس کے کچھ حصوں کو بھی متاثر کیا ہے، ذرائع نے بتایا کہ ہسپانوی اور پرتگالی حکومتی حکام نے بجلی کی اس اچانک بندش پر تبادلہ خیال کرنے کے لیے ملاقات کی۔
اپنے بیان میں اسپین کی حکومت نے کہا کہ "حکومت اس واقعے کا کھوج لگانے اور اسکے اثرات کا تعین کرنے کے لیے کام کر رہی ہے، اس مسئلے کو فوری حل کرنےلیے تمام وسائل بروئے کار لائے جارہے ہیں۔
ریڈ الیکٹرکا نے کہا کہ وہ بجلی کی بحالی کے لیے علاقائی توانائی کمپنیوں کے ساتھ کام کر رہی ہے۔ پرتگالی یوٹیلیٹی آر ای این نے کہا کہ اس نے بجلی کی سپلائی کی مرحلہ وار بحالی کے منصوبے کو فعال کر دیا ہے۔
خیال رہے کہ یورپ میں اتنے بڑے پیمانے پر بجلی کی بندش کے واقعات بہت کم دیکھنے میں آتےے ہیں، 2003 میں اٹلی اور سوئٹزرلینڈ کے درمیان ایک ہائیڈرو الیکٹرک پاور لائن میں ایک مسئلہ کی وجہ سے بیشتر اطالوی علاقوں میں تقریباً 12 گھنٹے تک بجلی بند رہی تھی۔
