بارسلونا: اسپینش فٹبال لیگ میں لائنل میسی اورکرسٹیانو رونالڈو کی ٹیموں نے میچ جیت لیے، میسی کی بارسلونا نے اسپانیول کو تین صفر سے شکست دی جبکہ رونالڈو کی ریال میڈرڈ نے ویلنسیا کو ایک کے مقابلے میں دو گول سے ہرادیا۔
تفصیلات کے مطابق اسپینش فٹبال لیگ کے اہم میچ میں بارسلونا کا مقابلہ اسپینیول سے تھا، دونوں ٹیمیں کھیل کے پہلے ہاف تک کوئی گول نہ کر سکیں، میچ کے پچاسویں منٹ میں لوئس سواریز نے بارسلونا کیلئے پہلا گول کیا۔
میسی کے اسکور نہ کرنے کےباوجود بارسلونا نے مزید دو گول اسکور کیے۔ اختتامی لمحات میں سواریز نے ایک بار پھر گیند کو جال میں پہنچا کر میچ تین صفر سے جیت لیا۔ مخالف ٹیم بھرپور کوشش کے باوجود کوئی گول نہ کر سکی۔
دوسرے میچ میں کرسٹیانو رونالڈو کی ریال میڈرڈ نے ویلنسیا کوشکست دے دی۔ رونالڈو نے ستائیسویں منٹ میں پہلا گول داغا۔ دوسرے ہاف میں ویلنسیا نے بھی گول اسکور کرکے مقابلہ ایک ایک سے برابر کردیا۔ میچ ختم ہونے سےچار منٹ قبل مارسیلو نے فیصلہ کن گول کرکے ریال میڈرڈ کو دو ایک سے فتح دلوائی۔
