اسلام آباد: اسپیکر قومی اسمبلی اسد قیصر نے مسلم لیگ ن کے رہنما خواجہ سعد رفیق کے پروڈکشن آرڈر جاری کردیے۔
تفصیلات کے مطابق اسپیکرقومی اسمبلی اسد قیصر نے مسلم لیگ ن کے گرفتار رکن اسمبلی خواجہ سعد رفیق کے پروڈکشن آرڈر جاری کردیے۔
قومی اسمبلی سیکریٹریٹ کی جانب سے جاری اعلامیے کے مطابق خواجہ سعد رفیق کے پروڈکشن آرڈر قومی اسمبلی میں کارروائی اور طریقہ کار کے قواعد 2007 کے قائدہ 108 کے تحت جاری کیے گئے۔
اس قانون کے مطابق اسپیکر قومی اسمبلی نے زیرحراست رکن اسمبلی کی موجودگی ضروری سمجھے تواجلاس کے لیے طلب کرسکتا ہے۔
پردوڈکشن آرڈر جاری ہونے کے بعد قانون نافذ کرنے والے ادارے گرفتار رکن اسمبلی کو اجلاس کے دوران قومی اسمبلی میں لانے کے پابند ہوں گے۔
یاد رہے کہ چار روز قبل جوڈیشل ایکٹوازم پینل کے سربراہ اظہر صدیق نے خواجہ سعد رفیق کے پروڈکشن آرڈر رکوانے کے لیے اسپیکر قومی اسمبلی کو خط لکھا تھا۔
نیب نے خواجہ سعد رفیق اور سلمان رفیق کو حراست میں لے لیا
واضح رہے کہ رواں ماہ 11 دسمبر کو نیب نے پیراگون ہاؤسنگ سوسائٹی اسکینڈل میں خواجہ سعد رفیق اور ان کے بھائی خواجہ سلمان رفیق کو گرفتار کیا تھا۔
