لاہور: پنجاب حکومت نے ایک خط کے ذریعے صوبے کی جیلوں میں قید مجرموں کو خصوصی مراعات دینے کا سلسلہ روک دیا ہے۔
تفصیلات کے مطابق حکومت پنجاب کی جانب سے آئی جی جیل خانہ جات کو خط لکھ کر کہا گیا ہے کہ جیلوں میں قید مجرموں کو خصوصی مراعات نہ دی جائیں۔
جیلوں میں خصوصی مراعات روکنے کے لیے17 جولائی کو آئی جی جیل خانہ جات کو خط لکھا گیا۔
یہ بھی پڑھیں: کیا نوازشریف سے اے سی اور ٹی وی کی سہولیات واپس لے لی گئیں؟
خط میں پنجاب حکومت نے منی لانڈرنگ کے مجرموں سے ترجیحی سلوک ممنوع قرار دیا، لکھا گیا کہ وزیر اعظم عمران خان کی ہدایت ہے مجرموں، منی لانڈرنگ کرنے والوں کو رعایت نہ دی جائے۔
واضح رہے کہ کوٹ لکھپت جیل میں قید سابق وزیر اعظم میاں نواز شریف سے اے سی اور ٹی وی کی سہولت واپس لے لی گئی ہے، نواز شریف سے بی کلاس کی دیگرسہولتیں بھی واپس لی جائیں گی۔
موصولہ اطلاعات کے مطابق اس ضمن میں محکمہ داخلہ، پنجاب کا ایک اجلاس بھی ہوا تھا، جس میں فیصلہ کیا گیا کہ کرپشن کے الزام میں قید تمام افرد سے بی کلاس کی سہولیات واپس لی جائیں گی۔
