اسلام آباد: صدر مملکت عارف علوی نے عید میلادالنبیﷺ کے موقع پر اہل وطن کو مبارکباد دیتے ہوئے کہا ہے کہ دعا ہے ماہ بابرکت ہمارے لیے باعث خیروبرکت ہو۔
اپنے جاری کردہ خصوصی پیغام میں صدر مملکت کا کہنا تھا کہ اللہ تعالیٰ نے نبیﷺ کو پوری انسانیت کے لیے کامل رہنما اور معلم بنا کر بھیجا ہے۔
انہوں نے کہا سرکار دو عالمﷺ کی تعلیمات سے زندگی کے ہر گوشے میں انقلاب برپا ہوگیا، آپ ﷺ کی آمد سے زندگی کے ہر شعبے میں خوشگوار تبدیلی روہنما ہوئی۔
عارف علوی کا کہنا تھا کہ حضرت محمدﷺ کی حیات مقدسہ ہمارے لیے کھلی کتاب کی صورت ہے، آپﷺ کی زندگی سادگی، انصاف، رحمت، سخاوت اور تواضع کا درس ہے۔
ہماری خوش قسمتی ہے کہ اللہ تعالیٰ نے ہمیں رسول ﷺ کا امتی بنایا، وزیراعظم کا خصوصی پیغام
ان کا مزید کہنا تھا کہ ریاست مدینہ کے مدنظر ہمیں دینی، قومی اور اجتماعی مفادات کو ترجیح دینی ہوگی، انسانیت کی فلاح کا دارومدار حضورﷺ کے اسوہ حسنہ پر عمل پیرا ہونے میں ہے۔
دوسری جانب وزیراعظم عمران خان نے عید میلاد النبی ﷺ کے موقع پر اپنے پیغام میں کہا ہے کہ آپ ﷺ کی جامع الصفات شخصیت ہر انسان کے لیے قابل تقلید ہے، آپ ﷺ نے اقوام عالم کو عدل و انصاف، مساوات، مذہبی رواداری کا پیغام دیا، آج وہ نظام دیکھنے کی نہ معلوم کتنی آنکھیں منتظر ہیں۔
وزیراعظم نے یہ بھی کہا کہ نبی کے امتی ہونے کے ناطے خود کو حضرت محمد ﷺ کی تعلیمات کے مطابق ڈھالنا ہوگا، آئیں پاکستان کو ریاست مدینہ کے طرز پر ڈھالنے کی کوشش کریں، ریاست مدینہ میں ہی ہم سب کی بقا اور سربلندی ہے۔
