لندن: شائقین کرکٹ کیلئے خوشخبری، ایجبسٹن کے بعد لارڈز میں بھی تماشائیوں کو اسٹیڈیم میں آنے کی اجازت مل گئی۔
پاکستان اور انگلینڈ کے درمیان آٹھ جولائی کو شروع ہونے والی ایک روزہ سیریز سے شائقین کرکٹ کو دوسری خوشخبری مل گئی ہے، لارڈز میں پاکستان اور انگلینڈ کی ٹیموں کے درمیان ہونے والےدوسرا ون ڈے بھی برطانیہ کے ایونٹ ریسرچ پروگرام میں شامل کرلیا گیا ہے۔
لارڈز کے تاریخی میدان کو ایونٹ ریسرچ پروگرام میں شامل کرنے کے بعد اب سو فیصد تماشائی اسٹیڈیم میں میچ سے لطف اندوز ہوسکیں گے،ستمبر دوہزار انیس کے بعد یہ پہلا موقع ہوگا کہ شائقین بھرپور تعداد میں اسٹیڈیم آسکیں گے، پاکستان اور انگلینڈ کےدرمیان دوسراون ڈے دس جولائی کو لارڈز میں شیڈول ہے۔
دونوں ٹیموں کے درمیان ایجبسٹن میں تیسرے ون ڈے کے لئے پہلے ہی اسی فیصد تماشائیوں کو اسٹیڈیم میں داخلے کی اجازت مل چکی ہے۔
یہ بھی پڑھیں: پاک انگلینڈ سیریز، تماشائیوں کی آمد سے متعلق بڑا فیصلہ
کرکٹ بورڈ نے ہدایت جاری کی کہ تمام عمر کے لوگوں کو داخلے کی اجازت ہوگی البتہ گیارہ سال سے زیادہ عمر کے اسٹیڈیم آنے والے شائقین کو دو ہفتے قبل کی کرونا منفی رپورٹ اور ویکسین کی دوسری خوراک لگوانے کا ثبوت بھی پیش کرنا ہوگا۔
واضح رہے کہ اس سے قبل انگلینڈ اور نیوزی لینڈ کے درمیان ہونے والے چار روزہ ٹیسٹ میچ کے دوران 60 ہزار شائقین کو ایجباسٹن اسٹیڈیم میں داخلے کی اجازت دی گئی تھی، جس میں کرکٹ بورڈ کو خاصی حد تک کامیابی حاصل رہی۔
یہ بھی یاد رہے کہ برمنگھم میں پاکستانی کمیونٹی کی بڑی تعداد آباد ہونے کی وجہ سے میچز میں ہاؤس فل ہی رہتا ہے کیونکہ ہم وطن گرین شرٹس کی حوصلہ افزائی کے لیے اسٹیڈیم ضرور آتے ہیں۔
