میڈرڈ: اسپین کی قومیت حاصل کرنے والوں کے لیے خوش خبری ہے کہ نیشنلٹی کے حصول کے پروسیس میں تیزی کی امید پیدا ہو گئی ہے۔

تفصیلات کے مطابق جب سے اسپین میں سوشلسٹ ورکرز پارٹی کی حکومت آئی ہے، تب سے ملک میں امیگریشن کے حوالے سے اہم اقدامات کیے گئے ہیں جو امیگرنٹس کے مفاد میں ہیں۔

اسپینش پیپلز پارٹی کی گزشتہ حکومت میں تارکین وطن کے گرد گھیرا تنگ کر دیا گیا تھا، اور نیشنلٹی کے حصول میں طریقہ کار پیچیدہ اور طویل ہونے کے سبب 3 سے 4 سال لگ جاتے تھے۔

رواں برس اسپین میں انتخابات ہوں گے، اس لیے حکمران جماعت چاہے گی کہ تارکین وطن انھیں ووٹ دیں، جس کی وجہ سے یہ امید کی جا رہی ہے کہ قومیت کے حصول کے پراسیس کو مزید آسان بنایا جائے گا۔

ایک رپورٹ کے مطابق اسپین میں نیشنلٹی کے حصول کی 3 لاکھ سے زیادہ درخواستیں زیر التوا ہیں۔

واضح رہے کہ 4 اور 6 مہینوں کے اندر نیشنلٹی ملنے کی خبریں اگرچہ درست ہیں تاہم یہ زیادہ تر جنوبی امریکی ممالک کے تارکین وطن کو دی گئی ہے، کولمبیائی ممالک جہاں اسپینش بولی جاتی ہے، کے شہریوں کے لیے لینگویج کورسز ضروری نہیں ہوتے۔