The news is by your side.

Advertisement

کرونا کیسز میں‌ کمی، کھیلوں‌ کی سرگرمیاں‌ بحال ، اسٹیڈیم کھولنے کا اعلان

مانچسٹر: برطانوی حکومت نے کرونا وائرس کے کیسز میں کمی کے بعد کھیلوں کی سرگرمیاں بحال کرنے کا اعلان کردیا۔

نمائندہ اے آر وائی نیوز کے مطابق برطانوی حکومت نے آؤٹ ڈور کھیلوں پر عائد پابندی کو 29 مارچ سے مرحلہ وار ختم کرنے کا فیصلہ کیا ہے۔

رپورٹ کے مطابق برطانیہ میں 29 مارچ سے ٹینس اور باسکٹ بال کورٹس اور گالف کورس کے علاوہ فٹ بال گراونڈ بھی کھول دیے جائیں گے جبکہ 21 جون تک تمام کھیلوں پر عائد پابندیاں ختم کر دی جائیں گی۔

ذرائع کے مطابق پاکستانی کرکٹ ٹیم جولائی میں انگلینڈ کا دورہ کرے گی، لاک ڈاؤن اور سماجی پابندیاں جون میں ختم ہونے کے بعد اس بات کا امکان بڑھ گیا ہے کہ اب کرکٹ شائقین کو اسٹیڈیم جانے کی اجازت ہو گی۔

کھیلوں پر عائد پابندی ختم ہونے کے باعث پاکستان اور انگلینڈ کے مابین ہونے والے ون ڈے اور ٹی ٹوینٹی سیزیز کی ٹکٹس فروخت ہو چکی ہیں۔

حکومت نے مرحلہ وار پابندیوں کو مشروط طور پر ختم کرنے کا اعلان کیا، اس حوالے سے چار شرائط پیش کی گئی ہیں ۔ رپورٹ کے مطابق ان شرائط میں، ویکسین پروگرام، اموات میں کمی، انفیکشن کی شرح اور نئے وائرس کی صورت حال شامل ہوگی۔

فیصلہ کیا گیا ہے کہ حکومت باقاعدگی سے اقدامات کا جائزہ لے گی،جس کے تحت سماجی دوری کم کرنے اور انٹرنیشنل ٹریول کی اجازت کا جائزہ لیا جائے گا جبکہ برطانوی شہروں ویلز، اسکاٹ لینڈ اور ناردرن آئرلینڈ میں عائد لاک ڈاؤن میں نرمی کے حوالے سے بھی اقدامات کیے جائیں گے اور ایس او پیز پر عمل کروانے کے لیے حکمت عملی بھی مرتب کی جائے گی۔

Comments

یہ بھی پڑھیں