ماسکو: روسی ادارے کا کہنا ہے کہ متحدہ عرب امارات نے کرونا ویکسین اسپوتنک لائٹ کے استعمال کی منظوری دے دی۔
تفصیلات کے مطابق یو اے ای کی وزارت صحت نے روس کی تیار کردہ کرونا وائرس ویکسین ‘اسپوتنک لائٹ’ کے استعمال کی منظوری دے دی۔
اسپوتنک لائٹ سے متعلق روسی ادارے رشین ڈائریکٹ انویسٹمنٹ فنڈ کا کہنا ہے کہ اسے کرونا ویکسینیشن کے علاوہ بوسٹر ڈوز کے طور پر بھی استعمال کیا جا سکتا ہے۔
متحدہ امارات نے اسپوتنک لائٹ کے سنگل ڈوز کو بھی بہ طور بوسٹر ڈوز منظوری دے دی ہے۔
یو اے ای حکام نے جنوری 2021 میں 2 ڈوزز پر مبنی اسپوتنک V ویکسین کی منظوری دی تھی، یہ کرونا وائرس کے خلاف رجسٹرڈ ہونے والی دنیا کی پہلی ویکسین تھی۔
روسی ادارے کے مطابق اسپوتنک V ویکسین کرونا وائرس کے خلاف طویل اور زیادہ پائیدار قوت مدافعت پیدا کرنے میں کام یاب رہی ہے، ویکسین کی کامیابی کو مدنظر رکھتے ہوئے روس نے دیگر ویکسین پروڈیوسرز کے ساتھ ویکسینز کے کمبنیشن پر مشترکہ ریسرچ شروع کر دی ہے، ان کمبنیشنز میں اسپوتنک V کو پہلے جز کے طور پر رکھا گیا ہے۔
اس سلسلے میں مختلف ممالک میں طبی تحقیقات جاری ہیں، جن میں متحدہ عرب امارات، روس، آذربائیجان، ارجنٹائن اور دیگر ممالک شامل ہیں۔
