سری لنکا کے اسپنر کامندو مینڈس نے گزشتہ روز بھارت کے خلاف پہلے ٹی ٹوئنٹی انٹرنیشنل میچ کے دوران دونوں ہاتھوں سے باؤلنگ کرکے ماہرین اور شائقین دونوں کو حیران کر دیا۔
سری لنکن اسپنر نے بھارتی بلے باز سوریا کمار یادو کے خلاف اپنے بائیں بازو سے بولنگ کی لیکن جب انہوں نے رشبھ پنت کو بال کرائی تو دائیں ہاتھ کا استعمال کیا، یہ منظر دیکھ شائقین اور ماہرین کو خوشگوار حیرت ہوئی۔
شائقین کو یہ اس بات کا بھی انتظار تھا کہ وہاں موجود دونوں اپمائروں میں سے کسی نے بھی کوئی اعتراض یا ایکشن نہیں لیا۔ قواعد و ضوابط اس کے بارے میں کیا کہتے ہیں؟۔
قوانین اس کے بارے میں کیا کہتے ہیں؟۔
انٹرنیشنل کرکٹ کونسل (آئی سی سی) کے قوانین کی شق 21.1.1 کے مطابق امپائر اس بات کا تعین کرے گا کہ بولر دائیں بازو سے گیند کرانا چاہتا ہے یا بائیں بازو سے، لیکن ایسا کرنے سے پہلے وہ اپمائر کو مطلع کرے گا۔
اگر بولر امپائر کو ڈیلیوری موڈ میں تبدیلی کے بارے میں مطلع نہیں کرتا ہے، تو یہ "نو بال” شمار ہوگی بصورت دیگر ایسی بالنگ قوانین کے عین مطابق ہے۔
واضح رہے کہ تین میچوں کی سیریز کے پہلے میچ میں بھارت نے پالے کیلے انٹرنیشنل کرکٹ اسٹیڈیم میں سری لنکا کو 43 رنز سے شکست دے کر 1-0 کی برتری حاصل کرلی ہے۔
ہندوستان کی ٹی20 ٹیم کے کپتان کے طور پر پہلے میچ میں سوریا کمار یادیو نے اپنے جارحانہ انداز کو برقرار رکھتے ہوئے 26 گیندوں پر شاندار 58 رنز کے ساتھ بہترین اننگ کھیلی۔
