کولمبو: سری لنکن کرکٹ بورڈ نے ٹیم کے دورہ پاکستان سے قبل سیکیورٹی کا دوبارہ جائزہ لینے کا فیصلہ کیا ہے۔
تفصیلات کے مطابق سری لنکن کرکٹ بورڈ دورہ پاکستان کے شیڈول کا اعلان ہونے کے باوجود تذبذب کا شکار نظر آرہا ہے اور سری لنکن کرکٹ بورڈ نے ٹیم پاکستان بھیجنے سے قبل دوبارہ سیکیورٹی کا جائزہ لینے کا فیصلہ کیا ہے۔
کرکٹ سری لنکا کا کہنا ہے کہ کھلاڑیوں کی سیکیورٹی اولین ترجیح ہے، دورہ پاکستان پر انتہائی ذمہ داری سے فیصلہ کریں گے۔
Update: Sri Lanka's Tour of Pakistan #PAKvSL
SLC has been advised to take extreme care, and ‘reassess’ the situation, before embarking on the Pakistan tour. https://t.co/8eYSuiWjog— Sri Lanka Cricket 🇱🇰 (@OfficialSLC) September 11, 2019
ادھر ترجمان پی سی بی کا کہنا ہے کہ سری لنکا کرکٹ کا بیان دیکھا ہے، سری لنکن ٹیم کی حفاظت سے متعلق کسی بھی معلومات کا تبادلہ نہیں کیا گیا ہے۔
ترجمان پاکستان کرکٹ بورڈ نے کہا کہ پی سی بی سری لنکن کرکٹ ٹیم کی مکمل حفاظت اور سیکیورٹی کے عزم کو دہراتا ہے، اس سلسلے میں سری لنکا کرکٹ بورڈ کے ساتھ تعاون جاری رکھے گا۔
We have seen the SLC statement, but are not privy to any information or intelligence report relating to safety of the SL team.
The PCB reiterates its commitment to provide complete safety and security to the SL side and in this relation will continue to work with the SLC.
— PCB Media (@TheRealPCBMedia) September 11, 2019
واضح رہے کہ پی سی بی رواں سال اکتوبر میں سری لنکا کے خلاف ٹیسٹ سیریز کی ہوم گراؤنڈز پر میزبانی کا خواہاں تھا، انتظامات کا جائزہ لینے کے لیے ایس ایل سی کا ایک سیکیورٹی وفد بھی کراچی و لاہور آیا اور اطمینان کا اظہار کیا تھا۔
چیئرمین پی سی بی احسان مانی نے سری لنکن بورڈ کے صدر سے فون پر بات کی تھی، بالآخر اتفاق رائے سے فیصلہ ہوا تھا کہ پہلے ون ڈے اور ٹی ٹوینٹی سیریز کھیلی جائے گی، ٹیسٹ سیریز دسمبر تک موخر کردی گئی تھی۔
پاکستان اور سری لنکا کے درمیان تین ون ڈے انٹرنیشنل 27، 29 ستمبر اور 2 اکتوبر کو نیشنل اسٹیڈیم میں کھیلے جائیں گے جبکہ ٹی ٹوینٹی سیریز کے تینچوں میچز لاہور میں 5، 7 اور 9 اکتوبر کو کھیلے جائیں گے۔
