اسلام آباد : پاکستان اورآئی ایم ایف کے درمیان آئندہ ہفتے اسٹاف لیول معاہدے کا امکان ہے، ایگزیکٹیو بورڈ کی منظوری سے پاکستان کو 1.1 ارب ڈالر کی آخری قسط ملے گی۔
تفصیلات کے مطابق 3 ارب ڈالر کے اسٹینڈ بائی ارینجمنٹ کے تحت 1.1 ارب ڈالر کی اگلی قسط کے حصول کے لیے پاکستان اور آئی ایم ایف کے درمیان اقتصادی جائزہ مذاکرات میں پیشرفت ہوئی۔
ذرائع وزارت خزانہ نے بتایا ہے کہ پاکستان اورآئی ایم ایف میں مذاکرات 18 مارچ کو کامیابی سے مکمل ہونے کا امکان ہے اور اگلے ہفتےکے اوائل میں اسٹاف کی سطح پر معاہدے کا امکان ہے۔
ذرائع کا کہنا ہے کہ حکومت نے بجلی ٹیرف میں بروقت اضافے کی یقین دہانی کرا دی، بجلی کی قیمتوں میں یکم جولائی سے مزید اضافے کا امکان ہے، کاسٹ ریکوری کیلئے ماہانہ، سہ ماہی اورسالانہ ایڈجسٹمنٹ کی جائے گی۔
اس کے علاوہ ٹیکس ریونیو بڑھانے کیلئے معیشت کو بتدریج دستاویزی شکل دینےکی بھی یقین دہانی کرائی جبکہ آئی ایم ایف نے بی آئی ایس پی کے تحت مستحقین کا تحفظ یقینی بنانے پر زور دیا، جس پر حکومت کی بی آئی ایس پی مستحقین کی تعدادجون تک مزید بڑھانے کی یقین دہانی کرادی ہے۔
ذرائع کے مطابق معاشی استحکام کے تسلسل کیلئے ضروری اصلاحات جاری رکھنے پر زور دیا جبکہ آئی ایم ایف نے سخت مانیٹری پالیسی ،مارکیٹ بیسڈ ایکس چینج ریٹ پالیسی برقراررکھنے کا مطالبہ کردیا ہے۔
مذاکرات کی کامیابی پر ایگزیکٹیو بورڈ کی منظوری سے پاکستان کو 1.1 ارب ڈالر کی آخری قسط ملے گی۔
