اسلام آباد: قومی اسمبلی ذرائع نے انکشاف کیا ہے کہ قائمہ کمیٹیوں کے چیئرمینوں نے نئی گاڑیاں فراہم کرنے کا مطالبہ کیا تھا، تاہم اسپیکر نے اسے مسترد کر دیا۔
تفصیلات کے مطابق قائمہ کمیٹیوں کے چیئرمینوں نے اسپیکر قومی اسمبلی سے پہلے سے فراہم گاڑیاں پرانی اور ناکارہ ہونے کی شکایت کی تھی، جس پر اسپیکر نے تمام گاڑیوں کی مرمت کی ہدایت جاری کی اور مرمت کے بعد یہ گاڑیاں چیئرمینوں کے حوالے کر دی گئیں۔
ذرائع نے بتایا کہ چیئرمین مسلسل نئی گاڑیاں فراہم کرنے کا مطالبہ کرتے رہے مگر اسپیکر نے انکارکر دیا، اسپیکر نے چیئرمینوں کو جواب دیا کہ خود ان کے پاس موجود گاڑی 2015 ماڈل کی ہے، جب کہ چیئرمینوں کو دی گئی گاڑیاں 2017 اور 2019 ماڈل کی ہیں۔
ذرائع کے مطابق اسپیکر قومی اسمبلی کا مؤقف تھا کہ اتنے فنڈز نہیں ہیں کہ نئی گاڑیاں خریدی جائیں، وزیر اعظم کی طرف سے بھی نئی گاڑیوں کی خریداری پر پابندی ہے، اور وزارت خزانہ نے بھی نئی گاڑیوں کے لیے فنڈز دینے سے انکار کر دیا تھا۔
