اسلام آباد: متحدہ عرب امارات کے ساتھ اظہار یک جہتی کے لیے پاکستان کے الیکٹرانک بینرز، اور ویب سائٹس لوگو سوگ کے رنگ میں ڈوب گئے ہیں۔
تفصیلات کے مطابق یو اے ای کے صدر شیخ خلیفہ بن زاید النہیان کی وفات پر پاکستان کے الیکٹرانک بینرز اور ویب سائٹس لوگو سوگ کے رنگ میں بدل دیے گئے ہیں۔
وزیر اطلاعات و نشریات مریم اورنگزیب نے اتوار کے روز کہا کہ متحدہ عرب امارات کے صدر شیخ خلیفہ بن زاید النہیان کے انتقال پر سوگ منانے کے لیے تمام ویب سائٹس کے لوگو اور سرکاری میڈیا کے الیکٹرانک بینرز کے رنگ تبدیل کر دیے گئے ہیں تاکہ اگلے تین دن تک تعزیت کی جا سکے۔
انھوں نے کہا 3 روز تک ٹی وی اسکرینز، ویب سائٹس سوگ کے رنگ میں ہی رہیں گی، یہ اقدام وزیر اعظم شہباز شریف کی خصوصی ہدایت اور یو اے ای حکومت، عوام سے یک جہتی کے اظہار کے لیے اٹھایا گیا ہے۔
انھوں نے کہا کہ متحدہ عرب امارات کے صدر شیخ خلیفہ بن زاید النہیان کے انتقال پر پاکستان ٹیلی ویژن اور ریڈیو پاکستان کے تمام الیکٹرانک بینرز اور ویب سائٹس کے لوگو کو سوگ کا رنگ دے دیا گیا ہے۔
انھوں نے مزید کہا کہ ریڈیو، ایسوسی ایٹڈ پریس آف پاکستان (اے پی پی) اور پریس انفارمیشن ڈیپارٹمنٹ (پی آئی ڈی) کے آفیشل ہینڈلز کے لوگو بھی اگلے تین دنوں تک سوگ کے رنگ میں نظر آئیں گے۔
مریم نے کہا خلیجی خطے کے تمام ممالک نے ان ہی خطوط پر اقدامات کیے ہیں، انھوں نے نجی میڈیا پر بھی زور دیا کہ وہ پاکستان کے دوست ملک کے عوام کے ساتھ اظہار یک جہتی کے لیے اپنے ٹی وی چینلز کے الیکٹرانک بینرز اور ویب سائٹس کے لوگو کے نشانات کا رنگ تبدیل کریں۔
