راولپنڈی : سابق وزیر داخلہ شیخ رشید نے اسٹیبلشمنٹ سے گزارش کی ہے کہ الیکشن سے دور رہیں، آپ کو ثابت کرنا ہے کہ آپ غیر جانبدار ہے۔
تفصیلات کے مطابق سابق وزیر داخلہ شیخ رشید کی جانب سے بیان میں کہا گیا ہے کہ کل کا دن بہت اہم ہے، اسٹیبلشمنٹ سے گزارش ہے وہ الیکشن سے دور رہے۔
شیخ رشید کا کہنا تھا کہ قوم کسی قسم کی دھاندلی اور دھونس برداشت نہیں کرے گی، آپ کو ثابت کرنا ہے کہ آپ غیرجانبدار ہے۔
سابق وزیر داخلہ نے مزید کہا کہ اگر عمران خان کو قوم ووٹ دینا چاہتی ہے تو ان کا راستہ نہ روکا جائے، اگر روکا گیا تو پورے ملک میں ایسی آگ پھیلے گی، جو سب کو لپیٹ میں لے لے گی۔
خیال رہے پنجاب کے 20 حلقوں میں ضمنی انتخاب کا معرکہ کل ہوگا ، چودہ اضلاع کے تقریبا پینتالیس لاکھ اسی ہزار ووٹر ووٹ کاسٹ کریں گے۔
ووٹنگ کے لیے تین ہزار سے زائد پولنگ اسٹیشن قائم کیے گئے ہیں ، جس میں سے انیس سو انتخابی مراکز حساس قرار دیئے جبکہ لاہور اور ملتان کے حلقے انتہائی حساس قرار دیے گئے ہیں۔
واضح رہے ضمنی انتخابات کی بیس نشستیں پی ٹی آئی ارکان کے منحرف ہونے پر خالی ہوئی تھیں۔
