نیویارک: وائٹ ہاؤس کے سابق مشیر اسٹیو بینن کو دیگر ملزمان کے ساتھ مل کر آن لائن فنڈ ریزنگ اسکیم کو عطیات دینے والوں کو دھوکہ دینے کے الزام میں گرفتار کر لیا گیا۔
تفصیلات کے مطابق وائٹ ہاؤس کے سابق مشیر اسٹیو بینن کو گرفتار کر لیا گیا۔اسٹیو بینن اور دیگر ملزمان پر فنڈ ریزنگ اسکیم ’وی بلڈ دی وال‘ میں عطیات دینے والوں کے ساتھ دھوکہ دہی کا الزام عائد کیا گیا ہے۔
غیر ملکی خبر رساں ایجنسی کے مطابق ملزمان پر مین ہٹن کی وفاقی عدالت میں فرد جرم عائد کی گئی۔
عدالت کی جانب سے عائد کردہ فرد جرم کے مطابق اسٹیو بینن نے وعدہ کیا تھا کہ عطیات کے ذریعے جمع ہونے والی مکمل رقم منصوبے کے لیے استعمال کی جائے گی، لیکن ملزمان نے مشترکہ طور پر ہزاروں ڈالر اس طریقے سے خرچ کیے جس کا انداز عوامی نمائندگی سے متضاد تھا۔
فرد جرم میں کہا گیا ہے کہ ملزمان نے حقیقت چھپانے کے لیے دیگر طریقوں کے علاوہ جعلی رسیدیں بنائیں اور مصنوعی وینڈر انتظامات کیے۔
وفاقی پراسیکیوٹرز نے الزام لگایا کہ اسٹیو بینن اور دیگر 3 ملزمان نے عطیات دینے والوں کو دھوکہ دینے کے لیے اسکیم بنائی تھی۔انہوں نے کہا کہ یہ اسکیم امریکا اور میکسیکو کی سرحد پر دیوار تعمیر کرنے کے لیے آن لائن کراؤڈ فنڈنگ مہم کے تحت جمع ہونے والے ڈھائی کروڑ ڈالر سے منسلک کر کے بنائی گئی تھی۔
