راولپنڈی: قومی ٹیم کے ابھرتے ہوئے اسٹار پیسر شاہین شاہ آفریدی نے کہا ہے کہ اب بھی اپنے بھائی ریاض آفریدی سے سیکھتا ہوں۔
راولپنڈی میں جاری پاک سری لنکن ٹیسٹ کے دوسرے روز کھیل کے اختتام پر میڈیا سے بات کرتے ہوئے شاہین شاہ آفریدی نے کہا کہ نیابال ہے کل اچھا پرفارم کر کے سری لنکا کو 300 سے پہلے آؤٹ کرنے کی کوشش کریں گے۔
بائیں ہاتھ کے فاسٹ بولر نے بتایا کہ جب میں کرکٹ میں نیا آیا تو بھائی سے سیکھنےکو ملا اور اب بھی اپنے بھائی ریاض آفریدی سے سیکھتا ہوں۔
انہوں نے کہا کہ بولنگ کوچ وقاریونس سے زیادہ سیکھنے کا موقع ملتا ہے اور ان کی دی گئی ٹپس سے پرفارم کرنے کی کوشش کرتا ہوں۔
یہ بھی پڑھیں:کوچز بہتر سمجھتے ہیں اسپنر کی ضرورت تھی یا نہیں، نسیم شاہ
گزشتہ روز قومی کرکٹ ٹیم کےنوجوان فاسٹ بولر نسیم شاہ نے ہوم گراؤنڈ میں کھیلنے کا موقع ملنے پر خوشی کا اظہار کرتے ہوئے کہا تھا کہ اپنے کراؤڈ کے سامنے کھیل کر اچھا لگا، کوشش ہوگی کل سری لنکا کو جلد سے جلد آؤٹ کریں۔
نسیم شاہ کا کہنا تھا کہ سری لنکن ٹیم نے پہلا سیشن اچھا کھیلا، پہلے جیسے بولنگ کرنی چاہئے تھی ویسے نہیں کی۔
نوجوان فاسٹ بولر نے کہا کہ کل کوشش کریں گے جلد از جلد وکٹیں حاصل کریں، فاسٹ بولرز کے لیے پچ مددگار تھی، کوچز بہتر سمجھتے ہیں کہ اسپنر کو کھلایا جانا چاہئے تھا یا نہیں۔
