لاہور: پوش علاقوں میں کروڑوں روپے کی چوریاں کرنے والے گینگ کا کارندہ گرفتار ہوگیا، ملزمان کئی سالوں سے بڑی وارداتیں کررہے تھے۔
تفصیلات کے مطابق پولیس نے بتایا کہ 3 رکنی گینگ سالہا سال سے چوری کی بڑی وارداتوں میں ملوث ہے، ملزم کی سی سی ٹی وی فوٹیجز بھی منظرعام پر آچکی ہیں، ملزم نے 2019 میں ڈیفنس میں 6 کروڑ روپے سے زائد مالیت کی چوری کی تھی۔
ملزم بلال نے چند ماہ میں ماڈل ٹاؤن اور ڈیفنس کے 3 گھروں میں کروڑوں کی چوری کی، فوٹیج میں ملزم کو منہ پر نقاب چڑھائے دیوار پھلانگ کر گھر میں گھستے دیکھا جاسکتا ہے۔
ملزم کو رات میں ماڈل ٹاؤن کی سڑکوں پرگھروں کی ریکی کرتے بھی دیکھا جاسکتا ہے، ملزم ماڈل ٹاون، ڈیفنس سمیت دیگرپوش علاقوں میں کئی سال سے چوریاں کررہا تھا، ملزم کو ڈیفنس سے گرفتار کیا گیا، مختلف تھانوں میں 100 سے زائد مقدمات درج ہیں۔
پولیس نے بتایا کہ ملزم سے لاکھوں روپے مالیت کا مال مسروقہ برآمد ہوا ہے، دیگر ساتھوں کی گرفتاری کیلئےچھاپے مارے جارہے ہیں، چوری کی وارداتیں کرنے والے گینگ میں خاتون سمیت 3 افراد شامل ہیں۔
