اسلام آباد: سپریم کورٹ آف پاکستان نے آبادی کے قریب اسٹون کرشنگ کو انسانی زندگیوں کے لیے خطرہ قرار دے دیا۔
تفصیلات کے مطابق سپریم کورٹ میں اسٹون کرشنگ پلانٹس کے خلاف کیس کی سماعت جسٹس منصور علی شاہ کی سربراہی میں تین رکنی بینچ نے کی، جسٹس منصور علی شاہ نے کہا آبادی کے قریب پاور اسٹون کرشرز انسانی جان کے لیے خطرہ ہے۔
جسٹس منصور نے آبادی کے قریب موجود پاور اسٹون کرشرز کو دوسری جگہ یا آبادی سے دور شفٹ کرنے کی ہدایت کی، انھوں نے کہا خیبر پختونخوا میں اسٹون کرشنگ کا ایشو بہت سیریس ہے، ہمارے سامنے کیس 3 اسٹون کرشرز کا ہے لیکن ایسے سینکڑوں پاور کرشرز ہیں جو آبادی کے قریب واقع ہیں۔
عدالت میں پاور کرشرز کی جانب سے وکالت کرنے والے اعتزاز احسن نے کہا ہمیں کمیشن رپورٹ کا جائزہ لینے کا وقت دیا جائے، میری استدعا ہے کہ کیس کو محرم کے بعد رکھا جائے، جسٹس منصور نے کہا اگر محرم کی بات ہے تو پھر اس کیس کا فیصلہ جلدی ہونا چاہیے۔
جسٹس منصور نے کہا ہم انڈسٹری کو بند نہیں کرنا چاہتے لیکن انسانی جانوں کا معاملہ بھی ہے۔ سپریم کورٹ نے ایڈیشنل ایڈووکیٹ جنرل کے پی اور وکیل اسٹون کرشرز کو کل تک کی مہلت دے دی۔ عدالت نے کہا کل اسٹون کرشرز کے وکیل نہ آئے تو کمیشن رپورٹ پر فیصلہ کر دیں گے۔
