واشنگٹن: طاقتور سمندری طوفان امریکی ریاست لوئزیانہ سے ٹکرا گیا جس کے باعث ریاست میں سیلابی صورت حال کا خطرہ ہے۔
تفصیلات کے مطابق لوئزیانہ میں سمندری طوفان ٹکرانے کے بعد محکمہ موسمیات نے ریاست کے کئی نشیبی مقامات میں سیلابی صورت حال پیدا ہونے کا خدشہ ظاہر کیا ہے۔
غیر ملکی خبر رساں ادارے کے مطابق امریکی ریاست لوئزیانہ کے شہر نیو اورلیئنز کو طاقتور سمندری طوفان بیری کے ساتھ آنے والی موسلادھار بارش کا بھی سامنا ہے۔
محکمہ موسمیات نے بتایا ہے کہ نیو اورلیئنز اور دیگر مقامات پر بیس انچ تک بارش ہو سکتی ہے، اس بارش کے بعد ریاست کے کئی نشیبی مقامات میں سیلابی صورت حال پیدا ہونے کا قوی امکان ظاہر کیا گیا ہے۔
بیری نامی سمندری طوفان ایسے وقت میں ٹکرایا ہے جب نیو اورلیئنز شہر میں سے گزرنے والا بڑا دریا مِسِسپی کی سطح طغیانی کے باعث پہلے ہی بلند ہے۔
ریاست لوئزیانہ کے گورنر جان بیل ایڈورڈ نے اپنے شہریوں کو ہوشیار اور خبردار رہنے کی ہدایت کر رکھی ہے۔ طوفان بیری کے ساتھ جھکڑوں کی رفتار اسی کلومیٹر فی گھنٹہ سے زائد ہے۔
